Анвар Бердиев: "Агар футболчи жамоага эмас, ўзи учун ўйнаса, шахсан менга керак эмас"

"Қийин ғалабага эришдик.  "Жайхун" менда ажойиб таассурот қолдирди. Футболчилар охиригача курашишди. Ўзимизга керакли бўлган натижага эришдик. Йигитларга борларини беришгани учун катта раҳмат айтаман",- дейди Анвар Бердиев. 

- "Жайхун" иштирок этадиган чемпионатдан келиб чиқиб бугун йирик ҳисобда таслим қилиниши керакмиди? 

- Бундай фикр бўлмади. Кубок баҳсларида ҳар хил вазият бўлиши мумкин. "Бунёдкор" билан ўйиндан кейин бу учрашувга астойдил тайёрландик. 

- Абдуғани Камолов бугун комбинацион ҳаракатларда яхши ўйин кўрсатди... 

- Абдуғани Камоловни яхши биламан. Жамоага ёрдами тегадиган футболчи. Орада маълум вақт ўйинини топа олмади. Кўрганингиздек ёмон тўп тепмаяпти. Унинг учун хурсандман. 

- Биринчи ўзгариш ҳақида. Жасур Холтўраев ўрнига Муҳриддин Зоиров тушди ва гол ҳам урди. Жасур Холтўраев қўл ҳам узатмади. Бундай ҳолат "Арал" билан ўйинда ҳам юз берган эди.. 

- Футболчи майдонга чиққанидан кейин мураббий томонидан берилган кўрсатмаларни бажариши шарт. Жасур Холтўраев бугунги ўйинга киришиб кета олмади. Футболда ўзгартириб бўлмайдиган футболчи йўқ. Футболчи жамоа учун борини бериб ўйнаши керак. Агар футболчи жамоага эмас, ўзи учун ўйнаса, шахсан менга керак эмас. Бу ҳар бир футболчига тегишли. Кейинги сафар яна шундай ҳолат кузатилса, бошқа футболчи алмаштирилиши мумкин. Жамоа футболчини боқяпти, маошини, мукофот пулларини беряпти. Демак ўйинчи ҳам ҳаракат қилиши керак. 

- Футболчига қандайдир чекловлар қилинадими?

- Биринчисида Жасур Холтўраев хатосини тан олиб, кечирим сўраганди. Бир марта кечириш мумкин, иккинчисида ўрнига футболчи қидириш керак. 

- Шерали Жўраев билан хайрлашиш ёш билан боғлиқми ёки қандайдир жазо тури қўлланилганми? 

- Буни олдинги матбуот анжуманида айтдим. Шерали Жўраевга омад тилайман. Бошқа жамоага бориб қўшилса фойдаси тегади.Негадир у мавсум бошида жароҳат олиб ўйнаб кета олмади. У билан дўстона хайрлашдик.