“Андижон”: Жадигеров, Лупашко ва Нажафалиев жамоани тарк этди

Ўз олдига олий лигага чиқиш вазифасини қўйган “Андижон” жамоаси иккинчи босқичга келаси ҳафтадан тайёргарликни бошлайди. Гарчи футболчилар таътилда бўлишларига қарамай таркибда ўзгаришлар рўй бермоқда.

Биринчи босқичда жамоамиз сафида тўп сурган уч нафар футболчи – Асқар Жадигеров, Александр Лупашко ва Аскер Нажафалиев “Андижон”ни тарк этишди. Жадигеров билан Лупашкога олий лига клубларидан таклиф тушгани боис улар кетишни лозим топишди. Айни пайтда Жадигеров “Нефтчи” таркибига қўшилган бўлса, Лупашко “Қизилқум” жамоаси машғулотларида иштирок этмоқда. 19 ёшли футболчи Нажафалиев эса “Андижон”да ўзини кўрсата олмади.

Умуман олганда Лупашко билан Жадигеров жамоамизнинг биринчи даврадаги муваффақиятли иштирокида муносиб ҳиссасини қўшишди. Тажрибали ярим ҳимоячи Жадигеров 18 учрашувда майдонга тушиб рақиблар дарвозасини 3 бор ишғол этган бўлса, Лупашко шунча ўйинда ўз ҳисобига 7та гол ёзиб қўйди.