Амир Тўрақулов: "Жамоа бўлиб ҳаракат қилдик ва шу туфайли ғалабага эриша олдик"

- Ўйин қандай ўтди?

- Ўйин чиндан ҳам жуда оғир кечди, тахминан шундай бўлишини кутгандик. Биринчи бўлимда осон бўлмади - барибир ёзги танаффусдан кейин ўйин ритмига кириш керак эди, ўйин темпи эса дарҳол юқори бўлди. Иккинчи бўлимга бошқача кайфиятда чиқдик, чунки учрашувда бурилиш ясашимиз мумкинлигини тушундик.

- Нима деб ўйлайсиз, ўйиндаги ғалабанинг асосий омили нима бўлди?

- Менимча, алмаштиришлар ҳал қилувчи лаҳза бўлди. Иккинчи бўлимда кўпчилик бўшашиб бўлгач, янги футболчилар майдонга тушиб, жамоага куч қўшишди. Улар ўйинга яхши киришиб, босимни кучайтиришди ва рақибга қаршилик қилишга ёрдам беришди. Аммо энг муҳими - биз бир жамоа бўлиб ҳаракат қилдик, майдоннинг ҳар бир қисмида бир-биримизни қўллаб-қувватладик ва менимча, шу орқали ғалабага эришдик.

- "Бунёдкор" сўнгги дақиқаларда ғалаба голини урганида - биринчи бўлиб нима хаёлга келди?

- Биринчиси - қувонч. Соф ҳиссиётлар. Шундай оғир ўйин ва шиддатли дақиқалардан кейин бу гол енгиллик ва мукофот бўлди.

- Илёс Зейтуллаев ўйиндан кейин кийиниш хонасида нима деди?

- Мураббий бундай мураккаб ўйинни уддалашгани учун барчага миннатдорчилик билдирди, жамоанинг характерини таъкидлади. Дарҳол тайёргарликни давом эттириш кераклигини айтди, чунки кейинги учрашув янада қийинроқ бўлади.

- Биринчи даврада етакчилардан бўлган Ҳамробеков ва Качорри кетганидан кейин жамоа қандай мослашмоқда?

- Албатта, жамоа учун катта аҳамиятга эга бўлган муҳим футболчилар билан хайрлашиш осон эмас. Аммо футболда шундай бўладики, кимдир кетади, кимдир келади. Биз услубни сақлаб қолишга ва уларсиз ҳам шундай чиройли ўйин кўрсатишга ҳаракат қиламиз. Ишончим комилки, уларнинг ўрнини тўлдириб, иккинчи даврада янада яхшироқ ўйнай оламиз.

- Жамоа мавсумнинг қолган қисмида қандай мақсадларни кўзлаган?

- Ҳозир олдимизда аниқ вазифалар йўқ. Биз ўйиндан-ўйинга ўтиб борамиз, ҳар бир баҳсда максимал очко олишга ҳаракат қиламиз, мавсум якунида эса ким қайси ўринда бўлиши маълум бўлади.