Александр Хомяков: "Футболда ҳар доим ютавермайсиз. Менимча, офсайд йўқ эди, лекин мен эксперт эмасман"

"Пахтакор"ни табриклаб қўйишим керак. Уларга ОЧЛда омад тилайман. Мухлисларимизга раҳмат. Томошабоп футбол бўлди дея олмайман, аммо бу финал ва биргина вазият ўйин тақдирини ўзгартириб юборади. Йигитлар курашишди ва борини беришди, аммо бугун ғалаба рақибга насиб этди" - деди Александр Хомяков.

— "Бухоро"нинг голи бекор қилинган вазият ҳақида гапирсангиз. Вазият такрорини кўришга улгурдингизми?

— Ўша вазиятда "пассив" офсайд бор экан дейишмоқда. Экспертлар ва ҳакамлар бор. Менинг фикрим уларники билан бир хил бўлмаслиги мумкин. Менимча, офсайд йўқ эди, лекин вазиятни ҳал қилмайман ва эксперт эмасман. Тўғри, аламли мағлубият, лекин биз ҳужумда агрессивроқ ўйнашимиз мумкин эди.

— Башар Ресанга сариқ карточка кўрсатилган вазиятда-чи?

— Менга ҳамма нарса бордек туюлаверади. Биринчи бўлимда Пўлатовга нисбатан ишлатилган қўполлик учун қизил карточкани кўрсатиш мумкин эди. Ҳакамларнинг даражаси юқори ва уларда тажриба катта.

— Ҳиссиётларга бой ўтган ўйиндан сўнг "Бухоро"нинг айрим футболчилари йиғлаётганини кўрдим. Кийиниш хонасида футболчиларга нима дедингиз? Ҳали олдинда чемпионат ўйинлари бор, йигитларни қандай руҳлантирмоқчисиз?

— Бундай вазиятда ҳеч қандай сўз шарт эмас. Йигитларимиз профессионал, уларни тинчлантириб ўтиришнинг ҳожати йўқ. Уч кундан кейин яна ўйнаймиз. Бир нарсани тушунинг, футболда ҳар доим ютавермайсиз. Бунинг иложи йўқ. Шундай мағлубиятлар ёш футболчиларимизга катта сабоқ ва тажриба бўлади деган умиддаман. Ҳаёт адолатсиз. Мана шундай вазиятлар ўз ҳаётидаги бир нимага интиладиган инсонларга яхши тажриба бўлади.

— Ўйиндан олдинги атмосфера қандай эди? "Пахтакор"га фаворит сифатида қаралдими? Ўйиндан сўнг Колакович йиғлаганини кўрдим ва бу ҳолат мени ҳайрон қолдирди. Бизда кўпгина легионерлар пул ишлаш учун келади. Колакович эса худди ёш боладек кўз ёшларини тийиб тура олмади.

— Тушунинг, футбол соврин ютиш учун ўйналади. Ҳозирги кунда футболчидан қаерда ўйнагансан деб эмас, нима ютгансан деб сўралади. Ҳар доим нима ютгансан деб сўрашади. Колакович анча йиллардан бери Ўзбекистонда тўп тепиб келмоқда ва шу сабабли у ўз номини тарихдан жой олишни истагандир. Биз мухлисларимиз ва оиламиз учун ўйнадик. Тўғри, рақиб анча кучли эди, лекин қўрқув йўқ эди. Ўйиндан олдин натижа қандай бўлишини билмайсиз. Фақатгина ўйиндаги ҳаракатларга эътиборли бўлишни сўрадим. Ёшлик чоғингизда кўчада қандай иштиёқ бўлган футбол ўйнаган бўлсангиз, бугун ҳам шундай хоҳиш ва иштиёқ билан ўйнанглар дедим.