Александр Ежов: "Рўзимбой Аҳмедов лидерлик қобилиятини кўрсатишга интилди"

"Ўйин ҳақида нима ҳам дердим. Қизиқарли ва курашларга бой ўйин бўлди. Ушбу учрашувда ютишимиз ёки аксинча ютқазишимиз мумкин эди. Рақибни ҳам бир очко билан табриклайман. Умуман олганда баҳс дурангга мос тарзда ўтди. Йигитларда босим кучлилик қилди. Лекин берилган кўрсатмаларни бажаришди. Ҳакамлар ҳақида гапириш менинг ваколатимга кирмайди. Уларни назорат қиладиган кишилар бор",- дея гап бошлади Ежов.

- Ўйлаб қўйган режаларингиз амалга ошдими?
- Барчаси ҳам амалга ошмади. Айтганимдек йигитларда босим катта бўлди. Ишлашда давом этамиз.

- Майдон ҳолати ҳақида нима дея оласиз?
- Майдон идеал ҳолатда эди. Муҳит ҳам ажойиб бўлди. Бунинг учун мухлисларга миннатдорчилик билдираман. Кўплаб ишқибозлар орасида тўп тепиш албатта бошқача завқ беради.

- Рақиб жамоа таркибида қайси футболчини ажратиб кўрсата оласиз?
- "Арал Самали"даги Наврўз Алимов ва Азамат Алланиёзовни яхши билардик. Биздан эса Рўзимбой Аҳмедов лидерлик қобилиятини кўрсатишга интилди. Орқа чизиқда эса Ғайрат Ўдаев. Унда кўп нарса ўхшамаган бўлса ҳам ёмон ўйнамади.

- Бугун "Хоразм" воҳа дербисида икки очко йўқотдими ёки бир очко қўлга киритдими?
- Юқорида таъкидлаганимдек бугун ютишимиз ёки ютқазишимиз мумкин эди. Икки жамоа ҳам очко йўқотгани йўқ.