Абдулла Абдуллаев: "Бир очко ҳам мундиал йўлланмасини тақдим этиши мумкин. Йўқ, биз ғалаба учун майдонга тушишимиз ва ғалаба қозонишимиз керак"

"Илк навбатда, ўйин сўнгига қадар ўрнидан туриб кетиб, стадионни тарк этмасдан, бизни қўллаб-қувватлаб турган мухлисларга миннатдорчилик билдираман. Ўйин эса қийин ўтди, сабаби "Хоразм"да савияли футболчилар йиғилган, бу ўйинолди таҳлилда ҳам акс этганди. Уларда интизом юқори.

Бугун чарчоқ аломатлари ҳам бўлди. Кўриб турибсизлар, ҳарорат жуда юқори. Шундай об-ҳаво шароитида ҳар 4-5 кунда ўйин ўтказяпмиз. Қолаверса, чемпионат даражаси ўсган. Ҳозир қайси жамоа бошқасидан кучли эканлигини ва бирор ўйинда қандай натижа қайд этилишини олдинда тахмин қилиб бўлмайди. Ҳар қандай жамоа ғалаба учун майдонга тушмоқда, шу боис, ўйинлар ҳам қизиқарли тус олмоқда. 

Олдинда "Бунёдкор", "Навбаҳор", "Насаф"га қарши ўйинлар кутиб турибди. Аммо буни қийин тақвим дея олмайман. Сабаби, битта биз эмас, барча жамоалар шундай тақвим асосида ўйинлар ўтказмоқда. Чарчоқни асло баҳона қилмоқчи эмасман, барчаси ўзимизга боғлиқ. Ўйлайманки, биринчи даврани шу нафасда ғалабалар билан якунлаймиз.

ФИФА кунларида Ўзбекистон терма жамоаси энг муҳим иккита ўйинни ўтказади. Футболчилар ғалаба учун майдонга тушади. Тўғри, бир очко ҳам мундиал йўлланмасини тақдим этиши мумкин. Йўқ, биз ғалаба учун майдонга тушишимиз ва ғалаба қозонишимиз керак", – деди 27 ёшли футболчи.