Аббос Файзуллаев: "ЦСКА туфайли Ўзбекистон термасида ўз ўрнимга эга бўлдим. Энди "Истанбул Башакшеҳир"га чемпионатда олдинга қадам ташлашида ёрдам бермоқчиман"

"Кеча фаолиятимда катта воқеа содир бўлди: мен ЦСКАдан "Истанбул Башакшеҳир"га ўтдим.

Менга ишониб, ўзимни янги поғонада кўрсатиш имкониятини бергани ва ривожланиш учун жуда зарур бўлган маслаҳатлар билан ёрдам бергани учун ЦСКА клуби, раҳбарият ва мураббийлар Владимир Федотов ва Марко Николичдан жуда миннатдорман. Бу ишончни оқлаш ва клубга фойда келтириш учун ҳар доим астойдил меҳнат қилганман. Клубнинг барча ходимлари, айниқса, мени илиқ кутиб олган ва биринчи кунданоқ кўмаклашган жамоадошларимга миннатдорлик билдираман. ЦСКА туфайли Ўзбекистон терма жамоаси сафида ўз ўрнимга эга бўлдим ва у билан унутилмас лаҳзаларни бошдан кечирдим: Париждаги Олимпия Ўйинларида иштирок этдим ва 2026 йилги Жаҳон чемпионатига йўлланма олдим.

Раҳмат, ЦСКА ва "армиячилар"нинг ажойиб мухлислари! Клубга чин дилдан омад ва янги буюк ғалабалар тилайман. Биз дўст бўлиб қоламиз ва мен ҳар доим сизларга мухлислик қиламан! ЦСКА ҳар доим биринчи бўлиб қолади!

Энди мен "Истанбул Башакшеҳир" футболчисиман. Бу мен учун янги чақирув бўлиб, ўзгача мотивация беради. Туркия маданияти ўзбек тилига яқин, ишончим комилки, бундай қизиқарли мамлакатда кўплаб ёқимли кашфиётлар ва воқеалар кутиб турибди. Айни пайтда Туркияда чемпионати жуда кучли: жиддий рақобат, шиддатли кураш. "Истанбул Башакшеҳир" ҳар йили юқори ўринлар учун курашади ва мен клубга чемпионатда олдинга қадам ташлашга ёрдам беришни жуда хоҳлайман. Айниқса, еврокубокларда илк бор ўйнаш имкониятига эга бўлганимдан қанчалик хурсанд эканлигимни таъкидламоқчиман: "Истанбул Бошакшеҳир" Конференциялар Лигасида ўйнайди ва бу курашда клубга ёрдам беришдан хурсанд бўламан.

Сиз билан учрашишни интиқлик билан кутаман, азиз "Истанбул Башакшеҳир" мухлислари!", – деди Файзуллаев.

Аввалроқ ЦСКА ҳимоячиси Игорь Дивеев Аббосга келажакда ўзи хоҳлаган лигада ўйнашини тилаган эди.