38 ёшга тўлган Лионель Месси ҳақида 38 та қизиқарли маълумот

Аргентиналик футболчи нечта ҳет-трик қайд этган? Уни дебютида майдондан четлатишганми? У ўзининг ёрқин профессионал фаолияти давомида қанча соврин қўлга киритган? Буларнинг барчаси ва бошқа кўплаб маълумотлар шу ерда...

1) Месси "Барселона" сафида 672 та гол урган – бу юқори даражадаги битта клуб учун энг кўп гол ҳисобланади. Аввалги рекорд Пелега тегишли бўлиб, у 1956 йилдан 1974 йилгача Бразилиянинг "Сантос" жамоасида 643 та гол урган эди. Месси сингари Пеле ҳам ўттиз ёшларининг ўрталарида АҚШга кўчиб ўтган (Пеле "Нью-Йорк Космос"га қўшилган).

2) Месси фаолияти давомида жами 866 та гол урган – "Барселона"да 672 та, "Пари Сен-Жермен"да 32 та, "Интер Майами"да 50 та ва Аргентина терма жамоасида 112 та. Голларни қайси тана аъзоси билан ургани бўйича тақсимот қуйидагича: чап оёқ: 725 та; ўнг оёқ: 109 та; бош: 28 та; кўкрак: 2 та; сон: 1 та; қўл: 1 та. Унинг Марадона орқали машҳурликка эришган "Худонинг қўли" услубидаги голи 2007 йил июнь ойида "Эспаньол"га қарши ўйинда киритилган.

3) Месси 2012 йилда клуб ва миллий терма жамоа сафида 91 та (69 ўйинда) гол урди, бу юқори даражадаги футболчи томонидан бир йилда киритилган энг кўп гол ҳисобланади. У 1972 йилда германиялик афсонавий футболчи Герд Мюллернинг 85 та голлик натижасини ортда қолдирди.

4) Месси Европанинг "Катта бешлик" лигаларида тарихда энг кўп гол урган футболчи ҳисобланади. Унинг 2023 йил май ойида "Пари Сен-Жермен" сафида "Страсбург"га қарши ўйинда урган сўнгги голи Европадаги фаолиятидаги 496-гол бўлди ва шу билан у Европанинг энг нуфузли лигаларида Криштиану Роналдунинг 495 та голлик натижасини ортда қолдирди.

5) Месси "Олтин тўп"ни рекорд даражада, нақ саккиз марта қўлга киритган – бу бошқа ҳар қандай футболчидан уч баробар кўп дегани. У 2009, 2010, 2011, 2012, 2015, 2019, 2021 ва 2023 йилларда дунёнинг энг яхши футболчиси деб тан олинган.

6) Месси Жаҳон чемпионатининг энг яхши ўйинчисига бериладиган "Олтин тўп" мукофотини икки марта қўлга киритган ягона футболчи саналади. У бу совринга 2014 йил Бразилиядаги мундиалда Аргентина финалда Германияга ютқазганида ва 2022 йил Қатарда бир умрлик орзусига эришган пайт лойиқ топилган.

7) Месси бир мавсумда олти марта клуб сафида 50 ва ундан ортиқ гол урган. Унинг энг юқори кўрсаткичи 2011-12 йилларда "Барселона" сафида қайд этган 73 та голидир. Шунга қарамай, "Барса" ўша мавсумда на Ла Лигада, на Чемпионлар Лигасида ғалаба қозона олган (лекин Испания Кубоги ва клублар ўртасидаги жаҳон чемпионатида ғолиб бўлган).

8) "Интер Майами"нинг энг машҳур футболчиси Барселона сафида 672 та гол урган. Бу рақам 2000 йилги АҚШ президентлик сайловларида Жорж Буш Флоридада Ал Горни мағлуб этган овозлар сонидан (537) кўпроқ. Ўша пайтда штат аҳолиси 16 миллион киши эди.

9) Месси атиги 13 ёшида Аргентинадан Барселонага кўчиб ўтиб, испан клубининг машҳур "Ла Масия" академиясига қўшилган. У 2004 йил октябрда "Барселона" асосий жамоасида дебют қилган ва 2021 йилда ПСЖга ўтгунга қадар 35 та совринга эришган.

10) Месси Аргентина терма жамоаси сафида 112 та гол урган ва терма жамоалар сафида юздан ортиқ гол урган уч футболчидан бирига айланган. Қолган иккитаси – Португалия терма жамоаси аъзоси Криштиану Роналду (138) ва Эрон терма жамоаси аъзоси Али Дайи (108).

11) 2022 йилги Жаҳон чемпионатида Аргентина терма жамоаси сардори гуруҳ босқичи, 1/8 финал, чорак финал, ярим финал ва финалда гол урди. У 1986 йилда турнирга 1/8 финал босқичи киритилганидан бери битта мусобақанинг ҳар бир босқичда гол урган биринчи футболчига айланди.

12) Месси Чемпионлар Лигасида саккизта ҳет-трик қайд этган. Бу Рауль, Терри Анри, Уэйн Руни, Муҳаммад Салоҳ, Златан Ибраҳимович, Робин ван Перси, Роналдо (бразилиялик), Ромелу Лукаку, Томас Мюллер, Давид Трезеге, Луис Суарес, Эдинсон Кавани, Диего Коста, Эрнан Креспо, Гонсало Игуаин, Альваро Мората, Антуан Гризманн, Николья Анелка, Лерой Сане, Чиро Иммобиле, Фернандо Торрес, Кристиан Виери ва Диего Форлан биргаликда эришган ҳет-триклар сонидан кўп.

13) 10 ёшида Мессига ўсиш гормони етишмовчилиги ташхиси қўйилди. Бу унинг футболчи бўлиб етишиши учун бўйи етарли бўлмаслигидан қўрқувга сабаб бўлди. Бироқ у ўсиш гормони билан даволанди ва натижада бўйи 170 смга етди.

14) Бу бўй уни ўртача америкалик эркакдан беш сантиметр пастроқ ва собиқ НБА ўйинчиси Мануте Болдан (7 фут 6 дюйм) деярли икки фут пастроқ эканлигини англатарди.

15) Месси Европада икки марта требль қайд этган саноқли футболчилардан бири ҳисобланади. У 2008-09 йилги мавсумда "Барселона" билан Ла Лига, Испания Қироллик кубоги ва Чемпионлар лигасини қўлга киритди, кейинчалик 2014-15 йилларда бу натижани такрорлади. У биринчи мавсумда 38 та, иккинчисида эса 58 та гол урди.

16) Мессининг Олимпия ўйинларида қўлга киритган олтин медали ҳам бор. Аргентиналик футболчи 2008 йил Хитойда бўлиб ўтган эркаклар футбол турнирида икки гол уриб, ўз мамлакатига ғалаба келтирди ва финалда Нигерияни 1:0 ҳисобида мағлуб этишда ёрдам берди. 2022 йилги жаҳон чемпионати финалида Месси билан бирга гол урган Анхель Ди Мария ўша ўйиндаги ягона голни урган эди.

17) Умумий ҳисобда Месси фаолияти давомида 59 та хет-трик қайд этган: "Барселона" сафида 48 та, "Интер Майами"да битта ва Аргентина терма жамоасида 10 та. У биринчи хет-тригини 19 ёшида, 2007 йил март ойида Ла Лигада "Реал Мадрид"га қарши 3:3 ҳисобидаги ўйинда амалга оширган.

18) "Барселона" эркаклар жамоасининг бутун тарихида урилган голларнинг етти фоизи (9606 тадан 672 таси) Мессига тегишли. Испан клуби 125 йилдан бери мавжуд, Месси эса бу клубда атиги 17 йил тўп тепган.

19) Месси фаолияти давомида 866 та гол урган бўлса-да, ҳеч қачон ўйиннинг биринчи дақиқасида рақиб дарвозасини ишғол этмаган.

20) Месси Аргентина терма жамоасидаги дебютида майдондан четлатилган. 2005 йил августда, 18 ёшида, Венгрияга қарши ўйинда захирадан майдонга тушганидан икки дақиқа ўтмай, Вилмос Ванcзакни тирсаги билан ургани учун қизил карточка олган. Умуман олганда, у фаолияти давомида уч марта ("Барселона"да бир марта ва Аргентинада икки марта) майдондан четлатилган.

21) Месси клублардаги фаолияти давомида 40 та совринни қўлга киритган ("Барселона"да 35 та, "Пари Сен-Жермен"да 3 та ва "Интер Майами"да 2 та). Бу ҳар 22 та клуб ўйинига битта совринга тўғри келишини англатади.

22) Месси бир ўйинда урган энг кўп гол сони – бешта. У буни икки марта амалга оширган: 2012 йил мартда Чемпионлар лигасида "Барселона" сафида "Байер"га қарши ва 2022 йил июнда Эстонияга қарши ўртоқлик ўйинида Аргентина терма жамоаси сафида амалга оширган.

23) 2022 йил декабрда бўлиб ўтган жаҳон чемпионати финалида Франция устидан қозонилган ғалаба Месси учун жаҳон чемпионатидаги 26-ўйин бўлди ва у Лотар Маттеуснинг Ғарбий Германия ва Германия терма жамоалари сафидаги 25 ўйинлик рекордини янгилади.

24) Ушбу турнирда иштирок этган Месси бешта жаҳон чемпионатида иштирок этган – бу рекордни у мексикалик учлик – Антонио Карбахал, Рафаэль Маркес ва Андрес Гуардадо, шунингдек Маттеус ва португалиялик Криштиану Роналду билан бўлишади.

25) Мессининг Аргентина терма жамоасидаги фаолияти (ҳозирча) 15 947 дақиқа давом этган – бу 11 кундан кўпроқ вақтга тенг. Тўхтовсиз ҳайдаганда, шу вақт ичида Майамидан Канаданинг Калгари шаҳригача бўлган тахминан 6000 миллик масофани уч марта босиб ўтиш мумкин бўларди.

26) Аргентиналик футболчи халқаро фаолияти давомида 38 та турли рақиб жамоалар дарвозасига гол урган. У энг кўп гол урган мамлакат Боливия бўлиб, 11 та тўп киритган. Бироқ бу голларнинг бирортаси ҳам Боливия ҳудудида урилмаган.

27) Месси Аргентина терма жамоаси сафида 193 марта майдонга тушган, бу натижа ҳам миллий, ҳам Жанубий Америка рекорди ҳисобланади. У эркаклар орасида халқаро ўйинларда энг кўп иштирок этган футболчилар рўйхатида тўртинчи ўринни эгаллайди.

28) Унинг фаолияти давомида энг кўп гол урган клуби Испаниянинг "Севилья" жамоаси бўлиб, испан клуби дарвозасига 38 та тўп киритган.

29) Месси ҳар доим ўз ватани сафида 10-рақамли футболкани киймаган. У Аргентина терма жамоасида 18 ва 19-рақамли либосларда ҳам ўйнаган. Унинг 10-рақамсиз сўнгги халқаро ўйини 2009 йил февралда Францияга қарши ўртоқлик учрашувида бўлиб, ўшанда 18-рақамли либосда майдонга тушган.

30) Месси Чемпионлар лигасида инглиз клублари дарвозасига 27 та гол урган – бу бошқа ҳар қандай футболчидан 7 тага кўп. У энг кўп гол урган инглиз жамоаси "Арсенал" бўлиб, "тўпчилар" дарвозасини 9 марта ўққа тутган.

31) У фаолияти давомида 68 та жарима зарбасидан гол урган (50 таси "Барселона", 2 таси "ПСЖ", 5 таси "Интер Майами" ва 11 таси Аргентина терма жамоаси сафида).

32) Месси Америка Кубоги тарихида энг кўп ўйин ўтказган футболчи бўлиб, мусобақада 39 марта иштирок этган. У 2024 йилги турнирда ўтган асрнинг 40-50 йилларида Чили дарвозабони Серхио Ливингстон томонидан ўрнатилган аввалги рекордни янгилади.

33) 2010 йилларда Месси бир ўзи деярли Англиянинг "Сандерленд" клубидан кўпроқ гол урган. Англия шимоли-шарқидан келган бу жамоа ўша ўн йиллик давомида саккиз мавсумни Премьер-лигада ўтказган.

34) Мессининг кетма-кет клуб ўйинларида энг кўп гол урган даври 10 та ўйинни ташкил этади. Бу натижага у "Барселона" билан 2012-13 йилги мавсумда, 25 ёшида эришган.

35) Месси кетма-кет клуб ўйинларида энг узоқ гол ура олмаган даври 12 та ўйинни ташкил этади. Бу 2006-07 йилги мавсумда, 19 ёшида содир бўлган. У бундай даврни Мадридга қарши Эл-Класикода хет-трик қайд этиб, ажойиб тарзда якунлади.

36) Мессининг Instagram постлари орасида энг кўп Like босилгани 2022 йилги жаҳон чемпионатида ғалаба қозонганидан кейинги байрамона сурати бўлиб, у бугунгача 74,6 миллиондан ортиқ ёқтириш олган. Бу Инстаграмдаги иккинчи энг машҳур пост – тухум фотосуратидан 14 миллион кўпроқ Like олган.

37) 2024 йилнинг 4 май куни Месси MLS тарихида бир ўйинда бешта голли узатмани амалга оширган илк футболчига айланди. "Майами" сафида ўз майдонида "Нью-Йорк Ред Буллс"га қарши ўйнаган ҳужумкор ярим ҳимоячи 48 ва 62-дақиқаларда Матиас Рохасга, 69-, 75- ва 81-дақиқаларда эса "Барселона"даги собиқ жамоадоши Луис Суаресга гол узатмаларини туҳфа қилган. 

38) Месси ўз фаолияти давомида жами 1108 та профессионал ўйин ўтказган. Булардан 778 таси "Барселона"да, 75 таси "Пари Сен-Жермен"да, 62 таси "Интер Майами"да ва 193 таси Аргентина терма жамоасида амалга ошган.