26-Кўрфаз Кубоги тугади. Баҳрайн - чемпион!

Бу йилги мусобақа қизиқиш ниҳоятда юқори бўлгани ҳамда телетрансляция сифатининг янада ошгани билан ёдда қолди.

Тарихга назар

Араб Кўрфаз Кубоги футбол федерацияси 1970 йилда ташкил топган бўлиб, 8та мамлакат аъзо ҳисобланади. Ушбу федерациясини ташкил қилиш ғояси 1968 йилги Олимпия ўйинлари пайтида юзага келган. Шундан сўнг федерация ташкил қилиниб, биринчи Кўрфаз Кубоги ўтказилган ва илк ғолиб Қувайт бўлган. 

Умуман олганда Қувайт терма жамоаси ушбу мусобақада энг кўп ғолибликни қўлга киритган. Кўрфаз Кубоги шу пайтгача 26 марта ўтказилган бўлса, шундан 10тасида Қувайт зафар қучган. Ироқ 4 марта, Саудия Арабистони билан Қатар эса уч мартадан ғолиб бўлган.

2009 йил ўтказилган Кўрфаз Кубоги янгича йўналишдаги трансляция билан ёдда қолди. Қатарнинг "Ал Жазира" телекомпанияси ўйинларни эфирга узатишни ўз зиммасига олади ва мусобақа илк бор HD форматда мухлисларга тақдим этилади. Ўз вақтида ФИФА собиқ президенти Зепп Блаттер ҳамда УЕФА собиқ раҳбари Мишель Платинининг мусобақага ташрифи Кўрфаз Кубогига бўлган эътиборни янада ошириб юборади. Ҳатто 2013 йил 4 октябрь куни бўлиб ўтган ФИФА Ижроқум йиғилишида мусобақани ФИФА халқаро тақвимига киритиш масаласи кўтарилади.

Мезбон мамлакатлар ва чемпионлар

Қуйида Кўрфаз Кубогига мезбонлик қилган мамлакатлар ҳамда чемпион жамоалар номини келтириб ўтамиз.

1970. Мезбон - Баҳрайн. Чемпион - Қувайт

1972. Мезбон - Саудия Арабистони. Чемпион - Қувайт

1974. Мезбон - Қувайт. Чемпион - Қувайт

1976. Мезбон - Қатар. Чемпион - Қувайт

1979. Мезбон - Ироқ. Чемпион - Ироқ

1982. Мезбон - БАА. Чемпион - Қувайт

1984. Мезбон - Уммон. Чемпион - Ироқ

1986. Мезбон - Баҳрайн. Чемпион - Қувайт

1988. Мезбон - Саудия Арабистони. Чемпион - Ироқ

1990. Мезбон - Қувайт. Чемпион - Қувайт

1992. Мезбон - Қатар. Чемпион - Қатар

1994. Мезбон - БАА. Чемпион - Саудия Арабистони

1996. Мезбон - Уммон. Чемпион - Қувайт

1998. Мезбон - Баҳрайн. Чемпион - Қувайт

2002. Мезбон - Саудия Арабистони. Чемпион - Саудия Арабистони

2003/04. Мезбон - Қувайт. Чемпион - Саудия Арабистони

2004. Мезбон - Қатар. Чемпион - Қатар

2007. Мезбон - БАА. Чемпион - БАА

2009. Мезбон - Уммон. Чемпион - Уммон

2010. Мезбон - Яман. Чемпион - Қувайт

2013. Мезбон - Баҳрайн. Чемпион - БАА

2014. Мезбон - Саудия Арабистони. Чемпион - Қатар

2017/18. Мезбон - Қувайт. Чемпион - Уммон

2019. Мезбон - Қатар. Чемпион - Баҳрайн

2023. Мезбон - Ироқ. Чемпион - Ироқ

2024/25. Мезбон - Қувайт. Чемпион - Баҳрайн

2026. Мезбон - Саудия Арабистони. Чемпион - ???

Бу йилги мусобақа ҳақида

26-Кўрфаз Кубоги бу сафар Қувайтда ташкил этилди ва ўтган йилнинг 21 декабрь куни старт олди. Кеча, 4 январь куни эса финал учрашуви ўтказилиб, бунда Баҳрайн Уммон терма жамоасини 2:1 ҳисобида мағлуб этди.

Мусобақада 8та жамоа иштирок этди. Жамоалар тўрттадан икки гуруҳга бўлинди.

A гуруҳи - Уммон, Қувайт, БАА, Қатар.

B гуруҳи - Баҳрайн, Саудия Арабистони, Ироқ, Яман.

Эътиборли жиҳати, ЖЧ-2026 саралаш ўйинларида бизга рақиблик қилаётган БАА ва Қатар битта гуруҳда баҳс олиб борди ва ҳар иккаласи гуруҳдан чиқа олмади.

Қувайт терма жамоаси иштирокидаги ўйинларда стадионга жуда кўплаб мухлислар ташриф буюрди. Масалан, Қувайт - Уммон ўйинига 42 минг, БАА - Қувайт учрашувига 48 минг, Қувайт - Қатар баҳсига эса 57 мингдан зиёд мухлис келди. Бундан ташқари 28 декабрь куни ўтказилган Ироқ - Саудия Арабистони баҳсини кузатиш учун 55 минг ишқибоз ташриф буюрди.

Гуруҳ босқичи якунларига кўра Уммон ва Қувайт, Баҳрайн ҳамда Саудия Арабистони терма жамоалари кейинги босқичга йўл олди. Ярим финалнинг биринчи ўйинида Уммон Саудия Арабистонидан 2:1 ҳисобида устун келган бўлса, иккинчи беллашувда Баҳрайн мезбон Қувайтни  1:0 ҳисобида мағлуб этиб мусобақадан чиқариб юборди.

31 декабрь оқшомида ўтказилган Баҳрайн - Қувайт ярим финал баҳсини кўриш учун стадионга 60 минг мухлис келди. Финал ўйинини эса 58 минг мухлис стадионда кузатиб борди.

Телетрансляция ва мукофот жамғармаси

Кўрфаз Кубогининг барча ўйинлари Баҳрайн, Ироқ, Қувайт, Уммон, Қатар, Саудия Арабистони, БАА ва Яман телеканаллари орқали тўғридан тўғри узатилди. Шунингдек, мусобақа АҚШ, Нидерландия ва Португалияда ҳам намойиш этилди.

Чемпионликни қўлга киритган Баҳрайн терма жамоаси 1 миллион, вице-чемпион Уммон эса 750 минг доллар пул мукофоти билан тақдирланди.

Мусобақа якунига кўра, Баҳрайн терма жамоаси ярим ҳимоячиси Моҳамед Марҳун "Энг яхши футболчи" ҳамда баҳрайнлик дарвозабон Эбраҳим Лутфалла "Энг яхши дарвозабон" деб топилди.

Кимлар мураббийлик қилди?

Шу ўринда мусобақа пайтида терма жамоаларни қайси мураббийлар бошқарганини ҳам келтириб ўтамиз.

Қувайт - Хуан Антони Пицци (Испания)

Уммон - Рашид Жабер (Уммон)

Қатар - Луис Гарсия (Испания)

БАА - Пауло Бенту (Португалия)

Баҳрайн - Драган Талайич (Хорватия)

Ироқ - Хесус Касас (Испания)

Саудия Арабистони - Эрве Ренар (Франция)

Яман - Нуриддин Оулд Али (Жазоир)

Навбатдаги Кўрфаз Кубогига 2026 йил Саудия Арабистони мезбонлик қилади. Бунда ҳам 8та терма жамоа иштирок этади ва сентябрь ойида ўтказиш режалаштирилган.

Х.Холиқов