"Флуминенсе" Неймарга клублар ўртасидаги ЖЧда ўйнашни таклиф қилди, аммо форвард "йўқ" деди

33 ёшли ҳужумчининг "Сантос" билан шартномаси 30 июнгача амал қилади. Футболчи Бразилия ва ундан ташқаридаги вариантларни кўриб чиқмоқда.

Setor Sul подкастида сўзлаган "Флуминенсе" президенти Марио Биттенкур клуб Неймарга 15 июндан 13 июлгача АҚШда бўлиб ўтадиган клублар ўртасидаги жаҳон чемпионатида қисқа муддатли ҳамкорлик таклиф қилганини тасдиқлади.

"Ҳа, мен чиндан ҳам кучли ўйинчиларни таклиф қилишга уриндим. Ҳозир Неймар ҳақида гапираяпман. Ренато Гаушо – Неймарнинг яхши дўсти. Мен у билан гаплашдим ва Неймарни таклиф қилиш ҳақида нима деб ўйлашини сўрадим. У "ажойиб фикр" деди ва Неймар билан гаплашди.

У (Неймар) одобли, тўғри муомала қилди ва менга унинг отаси билан гаплашишни маслаҳат берди. Неймарнинг отаси жуда дўстона муносабатда бўлди. У эшикни ёпмади, Неймарнинг ўзининг фикрини эшитишни хоҳлашини айтди.

Икки клуб раҳбарлари ўзаро дўстона муносабатда. У бу ҳақда ўйлаб, "Сантос" президенти билан гаплашишини айтди", – деди Биттенкур.

"Флуминенсе" президенти Неймар охир-оқибат таклифни рад этганини айтди. FaceTime орқали суҳбатда у қизиқиш учун миннатдорчилик билдирди, лекин бу даврни жисмоний формани тиклаш учун ишлатишни режалаштираётганини айтди.

"У таклифдан жуда хурсанд бўлганини, лекин бу ойни жисмоний ҳолатини яхшлашга сарф қилмоқчилигини айтди", – деди Биттенкур.