3 йиллик танаффусдан сўнг яна Японияга қарши ўйнаймиз

Бугунги кунга қадар термамиз японлар билан 9 марта тўқнаш келишган. Ҳисобимизда битта ғалаба мавжуд. 3та учрашув дуранг билан тугаган. Қолган 5та ўйинда "самурайлар" ғалаба қозонишган. Тўплар нисбатида японлар устун: 23:8.

Сўнгги бор ушбу жамоалар 2012 йилнинг 29 февраль куни ЖЧ-2014 саралаши доирасида Нагояда баҳс олиб боришган. Ўшанда марҳум Александр Шадрин томонидан урилган ягона гол Ўзбекистонга тарихий ғалабани келтирганди.

Япония мамлакатида ўтган яна учта учрашувда жамоамиз бир бор дуранг ўйнаган ва икки бор ютқазган.

Бу жамоалар фақат бир бор ўртоқлик учрашуви ўтказишган. 1996 йил Токиода ўтган ўртоқлик баҳсида японлар 1:0 ҳисобида устун келишган.

Эслатиб ўтамиз, Япония - Ўзбекистон учрашуви 31 март куни Тошкент вақти билан соат 15:25да бошланади.