Майдонда ўтлаган сигирлар, дарвоза ортидаги майхўрлик ҳамда ўйиндаги муштлашув – Суперлига тарихидаги биринчи жанубий америкалик легионерни ёдга оламиз

Ўзбекистон футбол тарихида кўплаб хорижлик ўйинчилар тўп тепган. Улар орасида Жанубий Америка минтақасидан ташриф буюрган илк футболчи сифатида Андерсон Карлос Фабианонинг номи алоҳида қайд этилади. Ушбу мақолада "Пахтакор" клубининг собиқ аъзоси, бразилиялик ҳужумчининг фаолияти ва эришган натижалари ҳақида сўз юритилади.

Андерсон 1972 йилнинг 24 мартида Бразилияда таваллуд топган. Бўйи 185 сантиметр бўлган ушбу футболчи асосан ҳужум чизиғида ҳаракат қилган. Унинг МДҲ мамлакатларидаги фаолияти дастлаб Россия чемпионатидан бошланган. 

У тўқсоннинчи йилларда Россия чемпионатида тўп тепиш учун келган бразилиялик футболчиларнинг дастлабки тўлқини вакилларидан бирига айланди. 1997 йилда ўз ҳамюртлари Режиналду Рибейру ва Жуниор билан биргаликда Иккинчи дивизион иштирокчиси – Туланинг "Арсенал" клуби сафига бориб қўшилди. Бошқа икки бразилияликдан фарқли ўлароқ, Андерсон "канонирлар"нинг асосий етакчиларидан бирига айлана олди. Рақиблар дарвозасига 15 та тўп киритиб, у жамоасининг ўз минтақасида ғолиб чиқишига ва Биринчи дивизионга йўлланма олишига катта ҳисса қўшди. 

Андерсоннинг "Арсенал" иштирокидаги ўйинларини кузатиш давомида бир учрашув диққатимни тортди. 1997 йил Иккинчи лиганинг 10-турида "Венец" жамоаси "Арсенал"ни қабул қилди.

Трибуналар бўлмагани сабабли мухлислар дуч келган жойга жойлашиб олишган. Масалан, тўрт киши ўйиндан олдин нақ дарвоза ортида чордана қуриб, спиртли ичимлик истеъмол қилган. Шунингдек, учрашув пайти майдонда сигирлар ўтлаб юрган. "Алания"дан "Арсенал" сафига ўтган Валерий Климов "Венец" дарвозабони Колмачевский билан тўқнашиб кетгач, жамоалар ўртасида оммавий муштлашув бошланган. Жанжал авжига чиққан бир паллада майдонга югуриб чиққан мухлислардан бири ҳимоячи Синевга ҳужум қилди. Қоидабузарнинг милиция ходимидан қочиб қутулишга оёғидан учиб кетган шиппаги халақит берган.

ВИДЕОНИ ТОМОША ҚИЛИШ

Кейинги мавсумда элитадан кейинги ўринда турувчи дивизионда муваффақиятли иштирок этиш мақсадида Тула клуби раҳбарияти яна тўққиз нафар жанубий америкалик футболчиларни таклиф қилди. 

Ҳужум чизиғидаги рақобат ақл бовар қилмас даражада кучайиб кетди, қолаверса, футболчининг ўзи ҳам спорт формасини сезиларли даражада йўқотиб, 1998 йилги чемпионат стартига қадар нақ 10 килограмм ортиқча вазн тўплаб олганди. Мавсумнинг тенг ярмини захира ўриндиғида ўтказган футболчи якунда Тошкентнинг "Пахтакор" клубига йўл олди.

Ҳужумчи Тула клуби таркибида жами 42 та расмий учрашувда майдонга тушиб, рақиблар дарвозасига 18 та тўп киритган.

1998 йил Андерсон Фабиано Тошкентнинг "Пахтакор" клуби билан шартнома имзолади. Бу воқеа Ўзбекистон футболи тарихида биринчи марта Жанубий Америка қитъаси вакилининг миллий чемпионатимизда пайдо бўлиши сифатида тарихга кирди.

Мавжуд статистик маълумотларга кўра, бразилиялик легионер тошкентликлар таркибида 8 та учрашувда иштирок этиб, 4 та гол муаллифига айланган (айрим спорт манбаларида 10 та ўйинда 5 та гол сифатида ҳам келтирилади). Майдонга тушган ҳар иккинчи ўйинида рақиблар дарвозасини ишғол қилган ҳужумчининг фойдали иш коэффициенти юқори бўлишига қарамай, унинг клубидаги фаолияти узоқ давом этмади.

Аҳамиятли жиҳати шундаки, Андерсон 1998 йилги мавсум якунларига кўра "Пахтакор" билан биргаликда Ўзбекистон чемпиони унвонини қўлга киритган.

Кейинчалик ватанига қайтган ҳужумчи фаолиятини "Фламенго де Гуарульюс" жамоаси давом эттирган. 2003 йил эса футболчилик фаолиятини якунлаган.

Оқил Абдубарноев тайёрлади.