Самвел Бабаян: "Кейинги босқичга чиқсак сариқ карточкалар куйиб кетади"
28 мар 2016 11:49
Янгиликлар
Самвел Бабаян: "Кейинги босқичга чиқсак сариқ карточкалар куйиб кетади"
"Бу босқичнинг охирги ўйинида ғалаба қозонишга ҳаракат қиламиз", - дейди Самвел Бабаян.
"Мураббийнинг фикрларига қўшиламан. Баҳрайнни мағлуб этиб мухлисларни хурсанд қилмоқчимиз", - дейди Марат Бикмаев.
- Анчадан буён терма жамоада ишлаяпсиз. Ўйиндан қониқиш ҳосил қилаяпсизми?
- Менимча ҳеч бир мураббий ўз жамоаси ўйинидан тўлиқ қониқиш ҳосил қилмаса керак. Аммо футболчилар ўзларини кўрсатишга уринишади.
- Рақиб қанчалик ўрганилди?
- Етарли даражада ўргандик. Охирги ўйинларини кўриб чиқдик. Бундан ташқари Баҳрайндаги ўйинни ҳам кўриб ўргандик. Уларда кучли мураббий бор. Рақиб ким бўлишидан қатъий назар ғалаба учун майдонга тушамиз.

- Баҳрайнга қарши ўйиндан олдин йўқотишлар йўқми?
- Эртага Ислом Тўхтахўжаев майдонга тушмаса керак. Ўтган баҳсда у жароҳат олганди. Афсуски унинг тушиш эҳтимоли жуда кам.
- Бошланғич таркибда ўзгаришлар бўладими? Ўтган ўйинда бўлгани каби стадион тўлиши кутилмоқда. Эртага чиройли ҳужумкор ўйин кўрамизми ёки 1:0 етарли ҳисобми?
- Тўхтахўжаев ҳақида айтиб ўтдим. Ҳеч бир жамоа доим ҳужумкор ўйин кўрсата олмайди. Эртага ғалаба қозона олсак бундан хурсанд бўламан.
- Беш нафар футболчида сариқ карточка бор. Бу сизни ўйлантирмаяптими?
- Сизни хурсанд қила оламан. ОФК вакили билан ҳозиргина гаплашдим, кейинги босқичда сариқ карточкалар куйиб кетади. Шундай экан эртага огоҳлантириш олмасак барчаси яхши бўлади.
- Шанба кунги машғулотлар анчагина қувноқ кайфиятда ўтганини кўрдик. Шоколадлар ҳам бўлганди...
- Жамоани руҳиятини кўтариш учун шундай қилдик. Энг техникаси кучли футболчини аниқладик. Унда Одил Аҳмедов ғолиб бўлди ва кубок топширилди. Қолган футболчиларга эса шоколадлар тарқатилди.
- Баҳрайнда сўнгги йилларда пасайиш кузатилмоқда. Футболчиларда олдинги мағлубиятлар учун алам олиш истаги борми?
- Баҳрайн кучсизланди дея олмайман. Улар ҳамон кучли таркибга эгалар. Эртага мухлислар олдида ғалаба қозонишга уринамиз.
- Гейнрихни вақтлироқ туширишни имкони йўқми?
- Саша терма жамоамизнинг муҳим бир бўлаги. Қозоғистонда мавсум энди бошланди. Шу боис ҳозирча уни камроқ вақтга тушираяпмиз. Лекин агар вазият тақозо этса Гейнрих исталган вақтда майдонга тушишга тайёр.
- "Бунёдкор" стадионида терма жамоамиз доим кам гол уриши ҳақида мухлислар айтишмоқда. Бу иримларга ишонасизми?
- Ўзбекистон терма жамоаси "Пахтакор"да ҳам, "Бунёдкор"да ҳам, "Жар"да ҳам мағлуб бўлган. Стадионнинг ҳеч қандай алоқаси йўқ. Шу боис яхши ўйнасак ғалаба қозонамиз.
Нарзулла Сайдуллаев
Ўхшаш янгиликлар
championat.asia
Breaking! Бозоров, Алибоев, Рўзиев ва Холмуродов терма жамоадан чақирув олди
Манба: Абдуқодир Ҳусанов — Осиёнинг 2025 йилдаги энг яхши ёш футболчиси!
АПЛ. Дуранглар оқшоми: байрамдан кейин жамоалар ғолиб бўлишни исташмади
Расман: "Челси" ва Энцо Мареска ўзаро келишув асосида ҳамкорликни тўхтатди
Фикрлар