ЖЧ-2014 олдидан. Рой Хожсон: “Англия ҳимояга ётиб олмайди”

Англия гуруҳдаги дастлабки учрашувини 15 июнь куни Италияга қарши ўтказади. Евро-2012 чорак финалида инглизлар айнан Италияга мағлуб бўлган ҳолда мусобақани тарк этгандилар. Ўшанда ўйин 0:0 ҳисобида якунига етган, пенальтилар сериясида эса омад “Скаудра адзурра” томонида бўлганди.

Рой Хожсон ўз интервьюсида шундай деди: “Биз жаҳон чемпионатида жасур, ўзимизга ишонган ва ҳеч кимдан қўрқмайдиган ҳолатда бўламиз. Қолаверса, ҳимояга ётиб олиш ниятимиз йўқ. Биз ҳар бир баҳсда ҳужум уюштирамиз ва ғалаба қозонишга ҳаракат қиламиз”.

“Англия чемпионатида жамоалар ҳужумни хуш кўришади, шундай экан, йигитлар терма жамоага келганда ҳам шундай ўйин кўрсатишларини хоҳлайман. Биз итальянларга бир қатор муаммолар туғдирмоқчимиз”.

Англия терма жамоаси ЖЧ-2014 саралаш босқичини мағлубиятсиз ўтказди. Улар фақат Польша, Черногория ва Украина билан дуранг ўйнашди, холос. Лекин ўртоқлик ўйинларида Чили ва Германияга имконият бой берилди. Англия ЖЧга боришдан олдин Перу, Гондурас ҳамда Эквадор билан куч синашиб кўради.

Эслатиб ўтамиз, Рой Хожсон жамоаси “D” гуруҳида Италия, Уругвай ва Коста-Рикага қарши баҳс олиб боради.

Х.Холиқов тайёрлади.