"Ювентус" жамоадан кетган Роналду ўрнига бомба трансфер тайёрламоқда

Ўтган ёзда "Юве" асосий юлдузини йўқотди - португалиялик голеадор Криштиану Роналду "Манчестер Юнайтед" билан шартнома имзолаб, Англия Премьер-лигасига қайтди.

"Олтин тўп"нинг беш карра соҳиби клубдан кетганидан кейин "кекса сеньорлар"да жиддий инқироз бошланди. Массимилиано Аллегри шогирдлари ҳужум чизиғида катта муаммоларни бошдан кечирмоқда. Жамоа А Серия доирасида сўнгги 17 учрашувида бор-йўғи 23 та гол уришга муваффақ бўлди. Ҳатто "Верона" ва "Болонья" ҳам туринликлардан кўпроқ гол уришга муваффақ бўлди.

Шу сабабли "Ювентус" ҳужум чизиғини кучайтириш ишларини бошлаб юборди. "Бавария" марказий ҳужумчиси Роберт Левандовски клуб эътиборига тушган.

Олдинроқ поляк футболчиси Мюнхендаги фаолиятидан кейин Италияга кўчиб ўтиши мумкинлигини тан олганди.

Форварднинг "Бавария" билан шартномаси 1,5 йилдан кейин якунига етади. Роберт "Олтин тўп" учун овоз бериш натижаларига кўра, иккинчи ўринни эгаллади.