Япониянинг ЖЧдаги дебютига 20 йил тўлди

Шундан бери орадан 20 йил ўтди ва японияликлар ўтган вақт ичида бирорта ҳам мундиални ўтказиб юборишмади. Фақат Бразилиягина ўз дебютини нишонлаганидан бери мунтазам мундиалда қатнашиб келаётган жамоа ҳисобланади. Бу борада Япония иккинчи ўринда.

ФИФА расмий сайти Япониянинг ЖЧлардаги иштирокига назар ташлаб, ўтган 20 йил ичида "самурайлар" қанчалик ўзгаргани ҳақида мақола чоп этди.

1998 йил. Япония ўзини дунёга танитди
Иштирок: Гуруҳ босқичи

Япониянинг илк иштироки ЖЧ-98га тўғри келади. Ўшанда кунчиқар юрт вакиллари Аргентина, Хорватия, Ямайка билан бир гуруҳдан жой олишганди. Гарчи жамоа гуруҳдан чиқа олмаган бўлса-да, Наката, Шинжи Оно каби футболчиларни дунёга танитиб берганди.

Фикр: "Мен ҳақиқий футболни Япониядан четга кетгач кўрдим. Менда хорижга чиқиш имконияти йўқ эди, чунки Жей-лигани ҳеч ким кўрмасди. Жаҳон чемпионатида қатнашиш эса кўплаб футболчилар учун четга чиқиш эшикларини очди". (Хидетоши Наката, 1998 йилги ЖЧда ўйнаган футболчи)

2002 йил. Мухлисларга ҳадя этилган қувонч
Иштирок: 1/8 финал

Орадан тўрт йил ўтиб мундиал икки мамлакат - Жанубий Корея ваа Японияда ташкил этилди. Японлар уйдаги ўйинларда ўзларини кўрсатмаса бўлмасди. Жамоа чиндан ҳам яхши ўйнади ва ҳатто Россияни мағлуб этишнинг уддасидан чиқди. Аммо нимчорак финалда Туркия уларни тўхтатди.

Фикр: "2002 йилги жаҳон чемпионатининг Ватанимизда ўтказилиши жуда катта воқеилик бўлди. Мана шу мундиал сабаб ҳали кўрасизлар ўнлаб футболчиларимиз хориж клубларига йўл олади" (Тсунеясу Миямото, мундиалдан сўнг берган интервьюсидан)

2006 йил. Гуруҳдан чиқа олмаслик
Иштирок: Гуруҳ босқичи

ЖЧ-2006да бразилиялик мураббий Зико бошчилигида Япония гуруҳдан чиқишни мақсад қилганди, аммо якунда бундай бўлмади. Бразилия, Хорватия ва Австралия орасига тушиб қолган японлар мақсадга эриша олмади.

Фикр: "Ҳаммаси жуда ёмон якун топди. Афсус. Биз гуруҳдан чиқамиз деб ўйлагандик". (Зико, Япония термаси собиқ бош мураббийи)

2010 йил. Африкадаги шижоат
Иштирок: 1/8 финал

Гуруҳда Дания ва Камерунни ортда қолдириб Голландиядан сўнг иккинчи ўрин билан Япония кичик сенсация қайд этганди. Ўшанда Кейсуке Хонда порлаганди. Аммо 1/8 финалда улар Парагвайга пенальтилар сериясида мағлуб бўлишади.

Фикр: "Бугун Япония футболи учун ўзгача кун. Терма жамоанинг мундиалдаги иштироки ёшлар онгига қаттиқ таъсир қилади. Биз ҳам футбол ўйнай олишимизни кўрсатиб бердик". (Дайсуке Мацуи, ЖЧ-2010 иштирокчиси)

2014 йил. Яна орқага қадам
Иштирок: Гуруҳ босқичи

Япония яна гуруҳда қолиб кетди. Жамоа учта ўйиннинг биттасида дуранг ўйнаб, икки бор ютқазди. Япония ўз гуруҳида Колумбия, Греция ва Кот-д'Ивуарга қарши баҳс олиб борганди.

Фикр: "Биз учун муҳими ҳозирги мавқени сақлаб қолиш. Гуруҳдан чиқа олмаганимиздан хафамиз, лекин кўрсатган ўйинимиздан уялмаймиз". (Макото Хасебе, ЖЧ-2014 иштирокчиси)

2018 йил. Бу сафар нима бўлади? 

Мана энди Япония ўз тарихида кетма-кет олтинчи марта мудиалда иштирок этади. Хўш, бу гал гуруҳдан чиқа оладими? Жамоа бош мураббийи Акира Нишинонинг айтишича, гуруҳдан чиқиш учун имконият яхши, бироқ ҳамма гап футболчиларнинг қандай ҳаракат қилишида. Япония ўз гуруҳида Сенегал, Польша ва Колумбияга қарши ўйнайди. Жамоа мундиалда Осиё шарафини муносиб ҳимоя қила оладими? Бу савол ҳозирча жавобсиз қолмоқда.