"Водий футболи": Ашурматов истеъфога чиқмоқчи

"Нефтчи": Ўтган йилги натижа яхшиланди

Фарғонанинг "Нефтчи" клуби 15та ўйинида 33 очко олди ва дастлабки даврани 3-ўринда тугатди.

Ўтган йил жамоа бутун мавсумда (26та тур) 28 очко тўплаганди. Жамоа бир давра ичида ўтган йилги натижани яхшилай олди.

"Нефтчи" иккинчи даврани Ғузорда "Шўртан"га қарши баҳс билан бошлайди.


"Қўқон-1912": Легионерларимиз "Пахтакор"га қарши ўйнай олмайди

Хабарингиз бор, 5 июль куни "Қўқон-1912" ўз майдонида "Пахтакор"ни қабул қилади.

Кеча жамоанинг икки нафар легионери Игорь Голбан ва Владимир Аргун ўз юртига жўнаб кетгани ҳақида хабар бергандик. 

Ушбу ўйинчилар қолдирилган баҳсда қўқонликларга ёрдам бера олишмайди.

"Навбаҳор": Бахтиёр Ашурматов истеъфога чиқмоқчи

"Локомотив" - "Навбаҳор" (5:1) учрашувидан кейинги матбуот анжуманида меҳмонлар устози ишдан кетиш ниятида эканини маълум қилди.

"Балки бугунги баҳс "Навбаҳор"даги сўнгги ўйиним бўлиши мумкин. Раҳбарият билан учрашувдан сўнг барчаси маълум бўлади. Балки янги мураббий келса жамоанинг натижалари яхшиланар. Ҳеч ким мени кетишимни сўрамади, шунчаки шахсан ўзим шундай ўйлаяпман", - дейди Ашурматов.