Валижон Раҳимов: "Иккинчи ўрин учун учта жамоа орасида кураш ўзининг қизғин палласига кирди"

Кучли шамол ва ёмғир остида кечган учрашувда олмалиқликлар ғалабани тантана қилди. Мазкур баҳсдан сўнг АГМК дарвозабони Валижон Раҳимов фикрлари билан ўртоқлашди.

- "Металлург" билан ўйин ҳақида...
- Авваламбор ассалому алайкум. Бекободда ўтган Тошкент вилояти дербисида ҳаво ноқулай бўлишига қарамасдан майдонда ҳақиқий жанг кечди. Азалдан бу икки жамоа ўртасидаги тўқнашувлар муросасиз ва қизиқарли бўлган. "Металлург" яхши жамоа. Уларга кейинги баҳсларда омад тилайман.

- АГМК тарихни янгилай оладими?
- Ҳа, худо хоҳласа ўтган йилги натижани янгилаш учун ҳаракат қиламиз. Ҳозирга келиб иккинчи ўрин учун учта жамоа ўртасидаги кураш қизғин паллага кирди.

- Жорий йилги мавсум жамоа учун қандай ўтмоқда?
- Жамоамиз бу йилги мавсумда яхши қатнашмоқда, деб ўйлайман. Ўзбекистон чемпионати ва халқаро майдонда катта тажриба тўпладик. "Ал Гарафа"га қарши плей-офф учрашуви ёддан чиқмайдиган бўлди. Бу ўйиндаги ғалаба бизга ОЧЛ гуруҳ босқичига йўлланма берди. Илк бор бу ишни уддасидан чиқа олдик.

- Олдинда терма жамоамизни Грузияга қарши ўртоқлик учрашуви кутмоқда. Сречко Катанец бошчилигидаги иккита йиғинда иштирок этдингиз. Унинг талаблари қандай?
- Сречко Катанец биринчи навбатда тартиб-интизом бўлишини талаб қилмоқда. Майдонда ва унинг ташқарисида ҳам. Ўртоқлик учрашувларига жиддий қарашимиз кераклигини, ҳар бир баҳсга охирги маротаба чиққандек ёндашишимизни истамоқда. Тезкор паслар билан олдинга ўтишимизни тушунтирмоқда.

Абдулазиз Искандаров ёзиб олди