Шоҳруз Норхонов: “Об-ҳаво қандай бўлишидан қатъий назар ғалаба қозонишга ҳаракат қиламиз”

Ушбу турда Жиззахнинг “Сўғдиёна” жамоаси ўз уйида Тошкентнинг “Обод” клубини қабул қилади. Бугунги учрашувдан олдин “Обод” жамоаси ҳужумчиси Шохруз Норхонов ўз фикрларини билдирди. 

“Миллий терма жамоамиз ЖЧ-2018 саралаш баҳсларида қатнашгани сабабли ички чемпионатимизда бироз танаффус бўлди. Ушбу тўхталиш пайтида ўртоқлик учрашувларини ўтказмасдан “Сўғдиёна” жамоасига қарши жиддий тайёргарлик кўрдик. Ўтказилган машғулотлар давомида кўпроқ жисмоний ҳолатимизга эътибор қаратдик. Тўғри, биринчи даврада ушбу жамоани ўз уйимизда мағлуб этгандик. Бугунги ўйин қандай бўлишини олдиндан айтиб бўлмайди. “Сўғдиёна” жамоасини ҳар томонлама ўрганиб чиқдик. Таркибимизда ҳеч қандай йўқотишлар йўқ. Барча футболчилар бугунги учрашувга тайёр. Мусобақа жадвалида бизни таъқиб қилиб келаётган жамоалар ҳам меҳмонда баҳс олиб боради. Шунинг учун ҳам бугунги баҳсда иложи борича 3 очкони қўлга киритишимиз керак. Аввалдан айтиб ўтганимдек, биз учун ҳар бир очко сув ва ҳаводек зарур. Биринчи даврада “Сўғдиёна” уйимизда мағлуб бўлгани учун, бугун бизга қарши бор кучи билан ғалаба қозонишга ҳаракат қилади. Ушбу жамоани мухлислари яхши қўллаб-қувватлашади. Лекин биз бунга эътибор бермасдан ўз ўйинимизни кўрсатамиз. Об-ҳаво қандай бўлишидан қатъий назар ғалаба қозонишга уринамиз. Фарғонанинг “Нефтчи” жамоасини мағлуб этганимиздан сўнг, барча футболчиларни кайфияти кўтарилиб кетди. Бугун ғалаба учун майдонга тушамиз” - дейди “Обод” клуби футболчиси Шохруз Норхонов

Жаҳонгир Сотволдиев