Шерали Бобоқулов: "Бугун биз ғалаба қозонишимиз ҳам мумкин эди"

Матбуот анжуманида дастлаб “Металлург W” жамоаси бош мураббийи Шерали Бобоқулов ўз фикрларини билдириб ўтди.

Шерали Бобоқулов:

- Бугунги учрашув жуда муҳим учрашув эди. Ўйлайманки, баҳс тенг курашлар остида ўтди. Дастлабки дақиқалардаги имкониятдан фойдаланганимизда бугун ғалаба қозонишимиз ҳам мумкин эди.

- Жамоанинг маҳоратига қойил қолдик. Анча тажрибали бўлган “Севинч” жамоаси билан тенг ўйин кўрсатишди. Олдинги ўйиндаги йирик мағлубиятни қандай изоҳлайсиз?
- Биз ўз стадионимизда ҳам ёмон ўйнамагандик. Фақат икки бор дарвозабонимизнинг йўл қўйган қўпол хатолари якунда йирик мағлубиятимизга сабаб бўлганди. Шунингдек ўз мухлисларимиз кўз ўнгида ортиқча босим остида тўп сургандик. Биз руҳий босимни кўтаролмадик.

- Махфуза Туропова ўтган мавсум “Севинч” жамоаси таркибида чиройли ўйинлари билан танилганди. Бугун у “Металлург-” таркибида яхши ўйнай олмади.
- Махфуза ўтган мавсум давралар оралиғида жароҳат олиб мавсум охиригача футбол ўйнай олмаганди. Бугун у майдонда ҳаракат қилган бўлса-да тўла соғайиб кетмаган. Биз унинг тажрибасига суянган ҳолда бугун майдонга туширишга таваккал қилдик.

- Наргиза Абдурасуловани нега захирага олдингиз?
- Режамизда уни эртароқ алмаштириш турганди. Сабаби унинг ўрнига тушган футболчи ҳам тезкор ҳам ўз техникасига эга ёш футболчи ҳисобланади. Бизга бугун Наргиза ўз тажрибаси билан ёрдам беришига умид қилгандик.