Сергей Лушан: "Жамоамни таний олмаяпман"
13 апр 2015 18:04
Янгиликлар

Сергей Лушан: "Жамоамни таний олмаяпман"

"Локомотив" - "Бунёдкор" учрашувидан сўнг ташкил этилган матбуот анжуманида Сергей Лушан қатнашди.

"0:3 ҳисобидаги мағлубиятдан сўнг қандай таассуротлар бўлиши мумкин? Ютқаздик. Биринчи бўлимда биз ўйинни буткул бой бердик. Гол ўтказгач жамоам ўйнамай қўймоқда. Жамоага нима бўлаётганини тушуна олмаяпман", - дейди Сергей Лушан.

- Шомуродовнинг қизил карточкасига муносабатингиз қандай?

- Қоида бор, футболчи икки марта сариқ карточка олса четлатилади. Ёшларда истак бор, аммо ақл камроқ.

- Жамоа ОЧЛда, олий лигада гол ура олмаяпти...

- Агар бунга нима сабаб бўлаётганини билганимда эди...Икки уч ўйинда жамоамни танимаяпман. Терма жамоага кетган футболчилар клубга қайтгач ўйини чиқмаяпти.

- Воҳид Шодиев бугун майдонга тушмади...

- Ўтган ўйинда қизил карточка олганди. Шу боис тушмади.

- "Бунёдкор" мухлислари ўйин давомида турли ҳайқириқларни бақиришди...

- Бунга оддий муносабатдаман. Мухлислар ҳайқиришлари учун ҳам керак. Аммо жамоада ишлаётганимдан тўла қониқаяпман.

- Янги Зеландиядаги мундиалга яна бир қатор футболчилар кетишади. Муаммони қандай бартараф этмоқчисиз?

- Тўғри улар Жаҳон чемпионатига жўнаб кетишади. Улар кетишса ёшлар жамоамиз аъзолари билан ўйнаймиз, ҳаёт давом этади.

- Жамоада молиявий муаммо йўқми?

- Йўқ ҳеч қандай муаммо йўқ. Агар бўлганида футболчилар бу ҳақда менга айтган бўлишарди.

Нарзулла Сайдуллаев

Ҳавола :

Манба : championat.asia

Янгиликларни Телеграмда ўқинг!