Самвел Бабаян: “Рақибдан кучлироқ эдик”

Ўйлашимча, “Пахтакор”нинг ҳар бири ўйини каби бугунгиси ҳам мухлисларга завқ бағишлади. Муҳим ўйинда керакли очколарни қўлга киритдик. Бугун биз рақибга нисбатан кучлироқ ўйнадик ва ҳақли равишда ғалабага эришдик деб ўйлайман. Иккинчи бўлимда ҳисобдан келиб чиқиб ўйнадик. Гол ўтказиб юбормаслигимиз муҳим эди. Шогирдларим кўрсатмаларни тўғри амалга оширишди. Тўғри, баъзи вазиятларда камчиликлар кузатилди. Лекин ҳеч бир ўйин идеал бўлмайди. Учрашувдан кейин видео орқали учинчи гол киритилган вазиятни кўрдик. Бу “тоза” гол эканлигини исботланди. Аммо ҳакамлар ҳам одам, улар ҳам адашиши мумкин.

-Бугун киритилган голлардан сўнг “Пахтакор” ҳимоявий ўйин кўрсатди. Жамоа “Локомотив”га қарши ҳужумкор ўйнайдими?
- “Пахтакор” ҳар доим ғалаба учун майдонга тушади. Ҳар қандай вазиятда бизлар учун ютуқ  муҳим. Бизнинг жамоа дуранг учун ўйнамайди. Ҳар бир жамоа киритган голлардан сўнг ҳимояда ўйнаши табиий ҳолат. “Ювентус”, “Барселона” каби жамоалар ҳам ютаётган пайтда ҳимояда ўйнашини кўрганмиз. Бу футбол. Ҳеч бир жамоа бутун беллашув давомида фақат ҳужум уюштириши иложсиз.  Биз дарвозамиз олдида “автобус” ўрнатган ҳолда ўйнамаймиз.