Погбанинг агенти "Ювентус" ярим ҳимоячиси жароҳатдан тузалгани ҳақида гапирди

“Нега у [тиззасини] операция қилишдан бош тортди? Чунки Поль консерватив терапия билан тезроқ қайтишига амин эди. Ва у жамоага ёрдам бериш учун имкон қадар тезроқ қайтишни мақсад қилганди. Яхшиямки, энди барча [қийинчиликлар] ортда қолди. Тез орада у майдонга қайтади ва "Ювентус" учун ўйнайди", – деди Пимента.

Аввалроқ 29 ёшли футболчи ноябрь ойи бошида ёки октябрь ойи охирида майдонга қайтиши мумкинлиги ҳақида хабар берилганди. Шу муносабат билан у Қатарда бўлиб ўтадиган Жаҳон чемпионати учун Франция терма жамоасининг қайдномасига кириш имкониятини сақлаб қолди.

Погба шу ёзда эркин агент сифатида "Ювентус"га ўтди ва клуб билан 4 йиллик шартнома имзолади. У ҳали жамоа таркибида бирорта ҳам ўйин ўтказмади.

Франция терма жамоаси бош мураббийи Дидье Дешам Погба ЖЧ-2022 учун терма жамоага қўшилиш учун ўз формасини тиклаши кераклигини таъкидлади.