Бу жамоалар шу кунга қадар 5 марта тўқнаш келишган. Дастлабки ўзаро ўйин 2001 йил Тошкентда ўтган. ЖЧ-2002 саралаши доирасида вакилларимиз рақибни тор-мор этишган - 5:0.
Жаъфар Ирисметов ва Миржалол Қосимов дублга эришган. Яна бир голга Максим Шацких муаллифлик қилган.
Уммонда ўтган учрашув эса биз учун жуда аламли мағлубият билан тугаган. Биринчи таймда вакилларимиз 2:0 ҳисобида олдинга чиқиб олишган. Бироқ иккинчи бўлимда майдон эгалари Алексей Поляков қўриқлаётган дарвозага 4та гол уришнинг уддасидан чиқишган - 4:2.
Кейинги учта баҳс ҳам ўртоқлик мақомида бўлган. Яъни Уммон билан расмий тўқнашувларда натижаларимиз тенг: бир ғалаба, бир мағлубият.
2008 йил Маскатда бўлиб ўтган ўртоқлик учрашувида майдон эгалари 2:0 ҳисобида ғалаба қозонишган.
2014 йил ушбу жамоалар Ўзбекистонда бир йўла иккита ўртоқлик учрашувида майдонга тушишган. Олмалиқ ва Тошкентда бўлган ўйинлар бир хил 0:1 ҳисоблари билан тугаган. Олмалиқда Миржалол Қосимов асосан ёш футболчиларни майдонга туширган бўлса, Тошкентдаги баҳс Максим Шацких, Виктор Карпенко ва Улуғбек Бақоевнинг хайрлашув ўйини бўлгани кўплаб мухлисларнинг ёдида бўлса керак.
9 январь кунги баҳсда Ўзбекистон терма жамоага омад ёр бўлишини тилаймиз!
Маълумот учун, 2018 йил Хитойда ўтган U-23 Осиё чемпионатида Ўзбекистон гуруҳда Уммон билан тўқнаш келган ва 1:0 ҳисобида ғалаба қозонган. Ўша учрашувда ягона голни айни пайтда миллий терма жамоа билан БААда бўлиб турган Достон Турсунов урган эди.
