Ўзбекистон терма жамоаси ҳужумчисига Суперлига, Корея ва араб жамоалари қизиқмоқда

Охирги йилларда фаолиятини Қатарда давом эттираётган ҳужумчимиз Темурхўжа Абдухолиқовни "Ас Сайлия" билан амалдаги битими 30 июнь куни тамом бўлади. Томонлар агарда янги келишувга эришишса, унда Абдухолиқов фаолиятини Қатарда давом эттириши мумкин. Акс ҳолда Ўзбекистон терма жамоаси ҳужумчиси фаолиятини Жанубий Корея ёки араб давлатларидан бирида давом эттириш эҳтимоли йўқ эмас. Шунингдек, Абдухолиқовга Суперлига клубларидан ҳам жиддий қизиқиш ва таклифлар мавжуд.

Бу борада биз Темурхўжа Абдухолиқов билан боғланганимизда, футболчи ушбу хабарни тасдиқлади. Абдухолиқовнинг таъкидлашича, кўп нарса Рамазон ойидан кейин маълум бўлади. Айни пайтда Қатарда чемпионат тугаган ва жамоалар танаффусга йўл олишган. Абдухолиқов унга бир қатор вариантлар мавжудлиги, хусусан Жанубий Корея ва араб жамоаларидан жиддий чақирувлар бўлаётганини тасдиқлади. Шунингдек, Суперлигадан ҳам чорлов бўлаётганини инкор этмади.

Эслатиб ўтамиз, қишда Темурхўжа Абдухолиқовга "Пахтакор"дан таклиф бўлган, аммо ҳужумчининг "Ас Сайлия" билан ўртадаги битими борлиги сабабли ушбу трансфер амалга ошмай қолганди.