Ўзбекистон – Саудия Арабистони ўйини олдидан Марат Бикмаев қандай фикрда?

 Бўлажак баҳс юқори аҳамият касб этишини инобатга олиб, ўз вақтида миллий терма жамоамиз таркибида кўплаб учрашувларда иштирок этган Марат Бикмаевнинг фикрларини билишга қизиқдик. Бугунги кунда Тошкентнинг “Локомотив” жамоаси шарафини ҳимоя қилаётган тажрибали футболчи, аввалига интервью беришни истамади. Аммо суҳбат МТЖ ўйини хақида ўтишини билиб, кейин розилик берди. 

- Бугун Ўзбекистон миллий терма жамоаси ЖЧ-2022 саралаши доирасида Саудия Арабистонига қарши муҳим учрашувини ўтказади. Бўлажак ўйин олдидан фикрингизни билдириб ўтсангиз?

- Мазкур баҳс жуда муҳимлигини барча яхши тушуниб турибди. Ўйин осон ўтмаслиги аниқ. Бугун терма жамоамиз кучли рақибга қарши сафарда ўйнайди. Саудия Арабистони терма жамоаси вакиллари мезбон сифатида бироз босим остида ўйнашини ҳисобга олсак, бу борада устунликка эгамиз. Ҳар бир ўйинда йигитлар фақат натижа учун курашиб келмоқда. Менимча бугун натижа деган фикрни миядан чиқариб юбориб ўйнаш фойдадан холи бўлмайди. Натижани ўйлаб майдонга тушадиган бўлсак, босим кучаяди. Эркин харакат қилиш керак. Менимча бугун қайси терма жамоа руҳий томондан кучли бўлса ўша ютади. Умид қиламанки, терма жамоамиз бугун ғалаба билан халқимизни хурсан қилади. 

- Ўзбекистон миллий терма жамоасининг охирги ўтказган иккита ўйинидан келиб чиқиб, айтадиган бўлсак, сизнингча бугун таркибда қандай ўзгаришларни кўришимиз мумкин?

- Буни аввало мураббий ҳал қилади. Яманга қарши кечган учрашувда бош мураббий менимча етакчи ўйинчиларимизга дам бериб, Саудия Арабистонига қарши ўйинга сақлаб олиб қўйган. Терма жамоамизга кучли футболчилар таклиф этилган. Уларнинг ҳар бирига ишонаман. Уларга фақат омад тилайман.

- Бугунги ўйинда қандай ҳисоб қайд этилишини кутяпсиз?

- Тўғриси учрашувлардан олдин ҳисобни башорат қилишни истамайман. Муҳими ғалаба бўлсин. 

Муҳаммаджон суҳбатлашди.