Учрашувдан кейин "олимпиячилар" сардори Беҳзод Шамсиевнинг фикрлари билан қизиқдик:
"АГМК ҳар қандай ҳолатда медаллар учун курашадиган, тажрибали футболчилар йиғилган кучли жамоа. Қийин бўлишини билардик. Ғалаба қозониш учун характер кўрсатишимиз керак эди. Ўйин учун барча йигитларга раҳмат".
— Учрашув шундай асабий руҳда ўтишини ҳам кутганмидингиз?
— Ҳеч ким ютқазишни истамайди. Биз нисбатан ёш жамоа бўлганимиз учун бошқа клублар 2 карра кўпроқ ютқазмасликка урунишади. Тўғриси, асаблар бунчалик чарчашини кутмагандик. Қизил карточкадан кейин ўйинда тўқнашувлар кўпайиб кетди ва бу қизғинликни ошириб юборди.
— Биз билган Беҳзод Шамсиев жуда кучли футболчи. Аммо ўтган йил охиридаги жароҳатлар туфайли фаолиятида пасайиш юзага келди. Ҳозир жисмоний ҳолатингизда муаммо йўқми?
— Шукр, тузалиб қолдим. Ҳозирча спорт формам тўлиқ тиклангани йўқ. Энди секин-секин юқорироқ даражага чиқишга ҳаракат қиламан.
