ОЧЛ-2018. "Насаф"нинг плей-оффдаги рақибининг 4 футболчиси бир йилга футболдан четлатилди
20 дек 2017 21:42
Янгиликлар

ОЧЛ-2018. "Насаф"нинг плей-оффдаги рақибининг 4 футболчиси бир йилга футболдан четлатилди

Ўзингизга маълум, Қаршининг “Насаф” жамоаси ОЧЛ-2018ни плей-офф босқичидан бошлайди.

Жамоа 2018 йил 30 январь куни ўз майдонида Иорданиянинг “Ал-Файсали” жамоасини қабул қилади.

Иордания клуби расмий сайтининг тарқатган хабарларидан шуни англаш мумкинки, кейинги пайтларда “Ал-Файсали” клуби муаммолар гирдобида қолмоқда. Жамоа Иордания Кубоги ярим финалида “Ал-Жазира”га имкониятни бой берди ва кубок финалига чиқа олмади. Дастлабки учрашувдаги мағлубиятдан сўнг жамоани шу йилнинг сентябрь ойида қабул қилиб олган хорватиялик мураббийи Драган Талажич ўз истеъфосини эълон қилди.

Бугунги хабар эса ҳаммасидан ўтиб тушди. ФИФАдан клуб номига келган расмий хатга кўра, жамоанинг тўрт нафар етакчи ўйинчисига, бир йил муддатга (2017 йил 14 августдан 2018 йил 14 августгача) ҳар қандай футбол учрашувида майдонга тушишига таъқиқ қўйилди. Булар Мовтаз Ёсин, Баха Абдул Раҳмон Иброҳим, Иброҳим Дледум Заваҳра ва ливиялик легионер футболчи Акрам Зваилардир. Шунингдек клуб раҳбариятидан Сулаймон Ал Ассоф икки йил муддатга футболдан четлатилган. Бу жазо нима сабабдан қўлланилгани хабарда айтилмаган.

“Ал-Файсали” клубига оид янгиликларни кузатишда давом этамиз.