Никимбаев: "ОФК Ўзбекистон клубларига кутилмаган совға тақдим этишга қарор қилди"

"Менда бор инсайдерлик маълумотларига кўра, ОФК Ўзбекистон клубларига кутилмаган совға тақдим этишга қарор қилди. Агар эсингизда бўлса, ОФК ижро қўмитаси октябрда 2021 йилдан бошлаб Чемпионлар лигаси иштирокчилари сонини 32тадан 40тага етказиш бўйича қарор қабул қилган эди. Ҳар бир зонадаги биринчи олти мамлакат квоталари ўзгармаслиги эълон қилинди. Яъни 2016-2019 натижаларига кўра 6-ўринни эгаллаган Ўзбекистон учун Чемпионлар лигасидан "1+1" (1та гуруҳда, 1та плей-оффда) кўринишида жой берилиши керак эди. Аммо маълум бўлишича, ОФК маъмурияти 5 кундан сўнг йиғиладиган мусобақалар қўмитасига тепадаги олтита мамлакат квоталарига 1тадан жой қўшиб беришни кўриб чиқишни таклиф қилди. Йўлланма гуруҳ босқичига бўлади, аммо Чемпионлар лигаси эмас, ОФК Кубоги учун.

Агар таклиф ижобий қабул қилинса, 2021 ва 22 йилларда Ўзбекистоннинг 3 клуби аввалгидек Осиё турнирларида кураш олиб боради: 2таси Чемпионлар лигасида (1+1) ва 1таси ОФК Кубогида (гуруҳ босқичидан 1та жой).

7-10-ўриндаги мамлакатлар эса Чемпионлар лигаси гуруҳ босқичи учун жойга эга бўлишади. Ғарбда бу йўлланма Туркманистон ва Тожикистонга тақдим этилади. 2021 йилги мавсум Марказий Осиё учун тарихий бўлиши мумкин. Қўмита қарорини кутиш қолди.

7-10-ўринни эгаллаб турган мамлакатлар қитъа турнирларида (Чемпионлар лигаси ва ОФК Кубоги) 3та жойга эга бўлишади.

7-9-ўриндагиларга бериладиган квоталар:

Чемпионлар лигаси гуруҳ босқичидан 1та жой, ОФК Кубогидан 2та жой

10-ўриндаги мамлакат учун квота:

Чемпионлар лигаси гуруҳ босқичидан 1та жой, ОФК Кубогидан 1та жой, ОФК Кубоги плей-офф босқичидан 1та жой.

2019 йл рейтингида Тожикистон 9, Туркманистон эса 10-ўринни эгаллаб турибди.

Қизиқ, агар ҳаммаси тепада кўрсатилганидек бўлсак, қуйидагилар ОФК Кубоги гуруҳ босқичига чиқиб бўлишган:

Ўзбекистондан 1та клуб

Тожикистондан 2та клуб

Туркманистондан 1та клуб

Қирғизистондан 1та клуб

Плей-оффда ўйнайдиганлар:

Туркманистондан 1та клуб

Қирғизистондан 1та клуб

Афғонистондан 1та клуб

ОФК Кубогида Марказий Осиё учун битта гуруҳ ажратилганини ҳисобга олсак, бу жамоаларни битта квартетга сиғдириб бўлмайди. Буларнинг барига эътибор берсак, хатто ОФК ходимлари ҳам ОФК Кубоги қандай ўтишини билишмаса керак" - дейилади Алишер Никимбаев Телеграм каналида.