Мухлисларсиз футбол бир тийинга қиммат

Қизиллар ўйинни ўз устозисиз бошлашди. Учрашувдан олдин "Ливерпуль" устози Юрген Клопп ўзини ёмон ҳис қилди ва у аппендицит бўлгани аниқланди. Майдонга бош мураббийсиз чиққан Мерсисайд клуби ўз мухлислари қўллаб-қувватлаши билан ажойиб ўйин ўтказаётган эди. Аввалига бироз қийинчиликка учраган мезбонлар, иккинчи бўлимда ҳисобни очишди. Сўнгги баҳсларда "Ливерпуль" ишқибозларининг ёқимтойига айланиб бораётган Роберто Фирмино Жеймс Милнернинг тўп оширишини голга айлантирди.

10 дақиқа ўтиб яна ўша бразилиялик Фирминонинг сай ҳаракатлари билан ҳисоб 2:0 кўринишига келди. "Хоффенхайм" собиқ ярим ҳимоячиси жарима майдончаси ичида тўпни Лалланага шунчалик қулай етказиб бердики, Адам уни дарвозага буриб юборса бўлди эди. Лаллана бу ишни эплади. 

Ҳаммаси жойида эди, аммо 77-дақиқада...

Бир неча кун олдин "Ливерпуль" мухлислари жамоанинг келаси мавсумдаги учрашув чипталари 59 фунтдан 77 фунтга оширилишидан норози бўлган. Шу сабаб, мерсисайд ишқибозлари клуб тарихида илк бор намойиш ўтказишга қарор қилган эди. Бу оддий намойиш бўлмаган, мухлислар ўйинниг 77-дақиқасида "Энфилд" стадионинин тарк этишга келишиб олишди ва шундай бўлди ҳам.

76-дақиқада ҳисоб 2:0 эди. Кейинги дақиқа бошланиши билан стадиондаги кўплаб мухлислар норозилик кайфиятида хуштак чалишди ва аста-секин трибуналар ўз эгасидан айрила бошалди. Турли баннерлар, хуштакбозлик, сўкинишлар... 

"Ливерпуль" мухлислари ҳеч қачон ўз севимлиларини бунчалик осон ташлаб кетмаган, хатто жамоа йирик ҳисобда мағлуб бўлаётган пайтда ҳам футболчиларни бор овозлари, қарсаклари билан қўллаб туришган. Бўшаб қолаётган стадионни кўрган футболчиларнинг кайфияти ҳам тушиб кетди. Сўнгги учрашувларда бирорта аниқ зарбани бартараф эта олмаган Миньоле бу сафар ҳам ўз жамоасини қутқариб қола олмади. Адам Жонсон 82-дақиқада ҳисобни қисқартирди.

Баҳснинг асосий вақти якунланишига бир дақиқа қолганда Жермейн Дефо "қизиллар"га "тарсаки туширди" ва ҳисоб тенглашди. Эҳтиросли мураббий ва енгилмас мухлисларисиз қолган "Ливерпуль" ҳеч нарса қила олмади. Ўйинда дуранг қайд этилди.

"Ливерпуль" раҳбарияти бу муаммони ҳал қилади деган умиддамиз, чунки ушбу клуб мухлисларига бутун дунё ҳавас билан қарайди. Мухлис мижоз эмас-ку!