Муҳаммадқодир Абдуллаев: "Футболчи сифатида хотира турнирида иштирок этганимдан хурсандман"

Динамо ва Фарғона вилояти фахрийлари ўртасида кечган баҳсда Абдуллаев фахрийлар жамоасида майдонда жавлон урди. Учрашувдан сўнг Муҳаммадқодир ўз фикрлари билан ўртоқлашди.

- Гувоҳи бўлганингиздек, Янгиқўрғон туманида 9 май  Хотира ва қадрлаш куни муносабати билан футбол шоуси ташкил этилди. Ушбу тадбирда шунчаки фахрий меҳмон сифатида эмас, майдонда футболчи бўлиб ҳаракат қилганимдан хурсандман. Боксми ёки футбол? Муҳими, барчамиз мамлакатимиз спорти ривожи йўлида ишлашимиз керак.



Туманларда мана шундай футбол ўйинларини кўпроқ ташкил этиб, мухлисларга хурсандчилик улашиш керак, деб ўйлайман. Бугунги учрашувни ташкил этган ташкилотчиларга ўзимнинг самимий миннатдорчилигимни изҳор этаман.
Қайси спорт тури бўлмасин, асосийси спортчиларимиз ҳамиша юртимиз шарафини халқаро майдонда муносиб ҳимоя қилиб, байроғимизни сарбаланд кўтаришсин! Чунки, спорт бу бир оила демакдир, - дейди Абдуллаев.

Исломбек Рустамбеков ёзиб олди