Машариповнинг янги жамоаси ўтган йилнинг охирги ўйинида ғалаба қозонди

Кеча бу клуб Саудия Пролигасининг 11-турни сафарда "Ал Файсали"га қарши ўтказиб, 3:2 ҳисобида ғалаба қозонди. Мазкур баҳсда Нордин Амрабат, Султон Ал Ганнам, Райед Ал Гамди томонидан киритилган голлар "Ал Насср"га ғалаба келтирди. 

Машариповнинг янги жамоаси 2:0 ҳисобида олдинда бораётиб, кейинчалик мезбонлар ҳисобни 2:2 кўринишга келтира олишди. 85-дақиқада ҳисоб тенглашган бўлса, орадан бир дақиқа ўтиб Райед Ал Гамди жамоасига ғалаба келтирган гол муаллифи бўлди. 

Бу "Ал Насср" учун ўтган йилнинг охирги ўйинидаги охирги ғалаба, янги мураббий Ален Хорват учун эса илк ўйиндаги илк ютуқ бўлди. Эслатиб ўтамиз, "Ал Насср" 11-турдан сўнг 11 очко билан турнир жадвалида 12-ўринни эгаллаб турибди. Саудия чемпионатида 16та жамоа иштирок этади. 

"Ал Насср" навбатдаги турни 8 январь куни ўз майдонида "Ал Айн"га қарши ўтказади. Шу ўйинда Жалолиддин Машариповнинг дебюти амалга ошиши кутилмоқда.