Иско Қатар ёки Туркия клубига ўтиши мумкин

2022 йил охирида "Севилья"ни тарк этган Иско айни пайтда ишсиз. Испаниялик футболчи билан музокаралар олиб борган Бундеслиганинг "Унион Берлин" ва "Лейпциг" жамоалари шартнома тузишгача етиб боришмади. "Лейпциг" 30 ёшли яримҳимоячи билан битим тузиш орқали клубнинг маош тизимини бузишни истамади.

Шундан кейин Искога Англия Премьер-лигаси вакили "Эвертон" қизиқиш билдирди. Бироқ якунда жамоа устози Исконинг жисмоний имкониятлари Англия чемпионатига тўғри келмаслиги мумкинлиги борасидаги фикридан сўнг бу келишув ҳам амалга ошмайдиган бўлди.

Иско ҳозирда Туркиянинг "Коняспор" ва Қатар Юлдузлар Лигасининг номи ошкор қилинмаган жамоаларидан биридан олган таклифини ўйлаб кўрмоқда. Нашр футболчининг Қатарга йўл олишга хоҳиш билдирмаётганини маълум қилди. Исконинг агенти унинг Европада қолиши учун музокараларни кучайтириши айтилмоқда.