Игорь Шквирин: "Зуагидан бошқа ҳеч ким ажралиб турмади"

Суҳбат давомида Игорь Анатольевич бу йил шогирдлари орасида Шакер Зуагидан бошқа ҳеч ким ажралиб турмаганини айтиб ўтди.

Олий лигада жамоалар сони ошгани ҳақида
- Агар молиявий талабларни кўтарадиган клублар кўп бўлса, мен олий лигада 18та жамоа қатнашиши тарафдориман. Бироқ 16та клуб ҳам ёмон эмас.

"Олмалиқ" 6-ўринни олгани ҳақида
- Ўтган йил билан солиштирганда бу мавсум бир қадам орқага ташладик. Бундан керакли хулосани чиқарамиз ва камчиликларни бартараф этиш устида ишлаймиз. Келаси йил медаллар учун курашадиган жамоа шакллантирамиз.

Зафар Полвонов ҳақида
- Зафар Полвонов ўтган йил 14та гол уриб жамоамиз тўпурари бўлганди. Шундан сўнг юлдузлик касалига чалинди, бор гап шу. Менимча, уни дарҳол осмондан ерга тушириш керак.

Жамоасидаги легионерлар ҳақида
- Бу ўринда аввало Шакер Зуагини алоҳида ажратиб кўрсатган бўлардим. У ўзига билдирилган ишончни оқлади. Александр Алимпиевич ҳам яхши ўйнаб турганди, бироқ биринчи даврадан кейин кетиб қолди. Шунингдек, сафимизни Мақсатмурод Шомуродов ҳам тарк этди. Зуаги келаси мавсумни "Олмалиқ"да ўтказмаслиги аниқ. Билишимча, у "Бунёдкор" билан оғзаки келишувга эришибди.

Диёр Туропов ҳақида
- Диёр Туропов - алоҳида мавзу. Футболчи ярим мавсумни тикланиш билан ўтказди. Қолаверса, кўпинча терма жамоаларда юрди. Энди сафимизга қайтганида яна терма жамоага кетиб қолаверди. Қолаверса, жиддий клублардан таклиф бўлаётгани тўғрисидаги гаплар унинг бошини айлантириб қўйди, гарчи ҳеч ким қизиқмаган бўлса-да. Шу ҳам унга халақит берди.