Футбол ва халқнинг устидан кулиш бу! (Эркин фикр)

Шу куни Саудия Арабистонига ютқазиб қўйдик ва барчаси тамом бўлди. Яна худди шу куни олий лигада навбатдаги тур баҳслари ўтказилди. Эсингизда бўлса, Ўзбекистон - С.Арабистони баҳси бизнинг вақт билан соат 16:00да бошланди. Худди шу вақтда Жиззахда “Сўғдиёна” - “Металлург” ўйинига старт берилди.

Терма жамоамиз Инчонда жон олиб жон бериб кейинги босқич йўлланмаси учун курашаётган бир пайтда Зоминда навбатдаги “спектакл” намойиш этилди. Тасаввур қиляпсизми, у ёқда қанақа футбол ўйналди-ю, бу ёқда нима ўйналди? Мана шундай ўйинларнинг касри терма жамоамизга урмаган деб ким ишонч билан айта олади? Бошқаларни билмадим-у, шахсан мен шундай нарсаларга ишонаман. Саудия билан ўйинни ёдга олинг-а, қўймаса ҳам бўладиган пенальти ва юз марта қайтарсангиз ҳам сира ўхшамайдиган автогол.

Масалан, мен олий лиганинг тавқи лаънатиси терма жамоага уришига ишонаман. Ёки Саудия бизга нисбатан шунчалик кучлимиди? Лаънат теккан чемпионатнинг касри афсуски, фақат ва фақат терма жамоаларга уряпти. Ўсмирларимиз жаҳон чемпионатига чиқа олмай қайтиб келишди, Осиё ўйинларида 20 йиллик тарихни такрорлаш пучга чиқди. Аммо бу билан олий лиганиям, биринчи лиганиям иши йўқ. Тошабинларга футбол эмас, цирк кўрсатиляпти. Худди биров чиқиб халқнинг кўз ўнгида маймун ўйнатаётгандек.

“Сўғдиёна” ўз майдонидаги охирги иккита беллашувда 5:4 ўйнаб, нафақат Жиззах футболи, балки бутун бир ўзбек футболининг устидан кулди. “Парма” - “Милан” баҳсидаги 5:4ни мисол сифатида келтирган Даврон Файзиев ана бўлмасам деб яна 5:4 ўйнади. Мен фақат бир нарсага ачиндим. Яъни, шу ўйинни Валентин Коваленкодек тажрибали ҳакам бошқарганига. Ундан кўра бирорта иккинчи лига ҳакамини қўйишса ўшаям бошқариб берарди.

Ўзи “Сўғдиёна” - “Навбаҳор” баҳсидан кейиноқ роса гап-сўзлар чиқиб кетганди. Лекин мавзу фақат шу ўйин билан ёпилиб қолмади. “Сўғдиёна” - “Металлург” ўйинидан кейин “келишилган ўйинлар” мавзуси яна очилди. Аммо ҳеч ким буни тан олаётгани йўқ. ПФЛ ҳам бу борада жим турибди. Бу худди оғир ётган беморнинг ҳаёт учун қийналиб курашаётганини кўра била туриб жимгина қараб турган дўхтиринг ҳолатига ўхшайди. Ахир ўзбек футболи жар ёқасига келиб қолди, ҳозир қулаб кетади, лекин ушлаб қоладиган қўл қани? Керак бўлса, ўша қўлнинг ўзи итариб юборишга тайёр.

Ўйиндан кейин иккала мураббий ҳам бундай майдонда футбол ўйнаш оғир дебди. Тўғри гап, оғир бўлгани учун ҳам “Пахтакор” зўрға 1:0га ютиб келди, “Бунёдкор” ва “Локомотив” аранг 2:0 ҳисобида ғалаба қозониб қайтди. Ваҳоланки, бу клубларда маҳорат бобида анча юқори футболчилар, керак бўлса, терма жамоа аъзолари тўп тепишади. Улар бундай майдонда қийналиб зўрға гол ураётган бир пайтда “Металлург” ва “Навбаҳор” тўртталаб ясади. Биз Сардор Рашидов, Егор Кримецларни кучли деб юрган эканмиз, лекин асл кучлилар “Металлург” билан “Навбаҳор”да экан. Энди терма жамоага шу клублардан ўйинчи олиш керак.

“Сўғдиёна”-ку мана шундай ёмон майдонда охирги икки ўйинда 10та гол урди. Ҳатто дунёнинг энг кучли клуби ҳам кетма-кет иккита беллашувда 10та гол уролмаса керак. Рақамларга эътибор беринг, “Сўғдиёна” урган голлар 29тага етди. Таққсолаш учун чемпионлик учун курашаётган “Пахтакор”да 32та, 6-ўринни эгаллаб турган “Олмалиқ”да 26та, 10-ўриндаги “Динамо”да эса 21та гол бор. Лекин бу жамоалар бемалол юришибди, “Сўғдиёна” эса бир кам ўттизта гол билан ҳам элитадан тушиб кетиши мумкин.

Хуллас, голларга бой бўлгани билан бу каби ўйинлар мухлисларга завқ улашиш учун эмас, балки халқнинг устидан кулиш учун ўйналмоқда. Бу қачонгача давом этишини билмадиг-у, лекин бу кетишда ёшларимиз (1995-96лар) Осиё чемпионатида, катталаримиз эса Осиё Кубогида ҳеч нарса кўрсата олмай қайтиб келишади.

Х.Холиқов.