Фотофакт! “Андижон” атиги уч нафар футболчини захира рўйхатига киритди

Қизиғи шундаки, анджижонликлар учрашув расмий қайдномасининг захирадаги ўйинчилар рўйхатига фақат уч нафар футболчини киритишди. Булар - дарвозабон Муҳиддин Худоёров, ҳимоячи Артур Маматказин ва ҳужумчи Шуҳрат Мирхолдиршоев. Ва мана шу футболчилардан икки нафари иккинчи бўлимда майдонга тушди.

Яхши биласиз, протокол тўлдирилаётганда захира рўйхатига еттита ўйинчини ёзиш мумкин. Бизда ўйин қайдномасини тўлиқ тўлдирмаслик ҳолатлари кўпинча биринчи лигада учрайди. Яъни, молиявий муаммолар сабаб кўпинча меҳмонда ўйнайдиган жамоалар кам ўйинчи билан боришади ва захира ўриндиғига эътибор берсангиз, икки-уч футболчи ўтирган бўлади. Аммо олий лигада тўғриси бунақа ҳолатни мен биринчи бор кўришим.

Бизга маълум бўлишича, “Андижон” футбол клубида асосий таркиб ўйинчилари билан боғлиқ бир нечта муаммолар юзага келган. Жумладан, Иброҳим Отахонов сариқ карточкалар туфайли кечаги беллашувни ўтказиб юборди. Мирзакамол Камолов, Алишер Тўхтасинов, Вячеслав Шевченко, Виталий Визавер эса тиббий кўрикдан ўта олишмаган.

Раҳим Қодировда жароҳат бор экан. Четда ўйнаб келган икки футболчи Акбар Хўжаев билан Азиз Ибрагимовнинг ҳали трансфер қоғози келмабди. Хуллас, шунақа гаплар. Жамоа навбатдаги турни ўз майдонида “Қизилқум”га қарши ўтказади. Балки шу ўйингача футболчилар кўпайиб қолар.

Х.Холиқов.