Фарруҳ Зокиров: "Биз ҳозирги таркибимиз билан ҳам кейинги босқичга чиқишимиз керак"
13 янв 20:20
Янгиликлар

Фарруҳ Зокиров: "Биз ҳозирги таркибимиз билан ҳам кейинги босқичга чиқишимиз керак"

Аёллар ўртасидаги футзал бўйича Осиё Кубоги "С" гуруҳи 1-туридан ўрин олган Филиппин - Ўзбекистон (3:3) баҳсидан сўнг терма жамоамиз бош мураббийи Фарруҳ Зокиров ўйин ҳақидаги фикрлари билан ўртоқлашди.

- Бугун терма жамоамиз саралаш босқичидаги дастлабки учрашувини ўтказди. Бугунги баҳс ҳақидаги таассуротларингиз билан бўлишсангиз. Бугун ғалаба қозонишимиз учун нима етишмади?

- Филиппин терма жамоаси ҳам бугунги баҳсга жуда пухта тайёргарлик кўрган экан. Филиппин жамоаси дастлабки учрашувда ғалаба қозонган эди. Таркибдаги айрим бир ўйинчилар ҳам юқори маҳоратли эканлигини кўрдингиз. Биз кўп вазиятларимиздан фойдалана олмадик ва шу сабабли учрашув дуранг билан якунланди.

- Терма жамоамиз кетма-кет йиғинлардан сўнг саралаш мусобақасига қандай ҳолатда етиб келди? Футзалчиларимиз айни дамда ўзларининг энг яхши спорт формасидами?

- Биз ушбу мусобақага яхши тайёргарлик кўрдик. Асосий футзалчиларимиздан бири Гулзода Амирова ҳали ҳамон тикланиш жараёнида. Биз ҳозирги таркибимиз билан ҳам кейинги босқичга чиқишимиз керак.

- Бугунги учрашувда жамоамизда қандай камчиликлар кузатилди?

- Бизнинг ўйинчиларимиз бир хил ҳолатда эмас. Кейинги ўйинларга қадар биз иккита тенг таркибга эга бўламиз деган умиддаман.