Эрон билан ўйинга 11 кун қолди. Ҳаяжон ортиб бормоқда

6 июнь куни Тошкентда Таиланд термаси меҳмон бўлади. Бу жамоага қарши ўртоқлик учрашуви "Бунёдкор" стадионида кечади ва 20:00да бошланиши режалаштирилган.

Шундан сўнг 12 июнда Теҳронда Эрон термаси меҳмони бўламиз. ЖЧ-2018 саралаш босқичидан ўрин олган бу учрашув биз учун жуда катта аҳамиятга эга. Агар ғалаба қозонсак, мундиалга тўғридан-тўғри йўлланма олиш учун қулай имкониятга эга бўламиз.

Мабодо мағлуб бўлсак, (бу ҳақда ўйлашни ҳам истамаймиз), унда Эрон саралаш босқичи тугашига икки тур қолганида расман ЖЧга чиққан жамоа ҳисобланади.

Биласизми, шу пайтгача Эрон билан ўша машҳур "Озоди" стадионида фақат бир марта ўйнаганмиз ва ҒАЛАБА қозонганмиз. Бу воқеа 2012 йилнинг 14 ноябрида содир бўлганди. ЖЧ-2014 саралаш босқичидан ўрин олган беллашувда БИЗ ютганмиз.

Ҳозиргидек эсимда, учрашувни "Спорт" телеканали орқали устоз шарҳловчи Мирзаҳаким ака Тўхтамирзаев шарҳлаб боргандилар. Ўйиннинг 71-дақиқасида Улуғбек Бақоев томонидан киритилган ягона гол бизга уч очко келтирганди. Эсингиздами, финал ҳуштаги чалинганидан сўнг Азиз Ҳайдаровнинг бош ҳакам Али Бадвавини қучоқламоқчи бўлгани. Мана шу ўйин Эрон - Ўзбекистон баҳси бўлади.

Сайтимизни кузатишда давом этинг, Теҳрондаги учрашув қаҳрамони Улуғбек Бақоев ва ўйинда қатнашган бошқа футболчилар билан суҳбатлар қилишни мақсад қилиб қўйганмиз. Айтганча, ўша пайтда терма жамоамиз бош мураббийи Миржалол Қосимов эди.

Х.Холиқов.