"Челси" Мойзес Кайседога катта маблағ сарфлайди

Бу сафарги нишонда Премьер-лига вакили "Брайтон" юлдузи Мойзес Кайседо белгиланди. Грэм Поттерни яна шогирди билан бирлаштириш "Стэмфорд Бриж" эгаларига 75 млн фунтга тушади. Мутахассис аввалги жамоасида жанубий қирғоқда 21 ёшли футболчи билан шартнома имзолади ва унга мураббийлик қилди. Кайседо 2021 йилда Эквадор жамоасидан 4,4 млн фунтга харид қилинганидан кейин кучайганидан кучайиб борди. 

Ярим ҳимоячининг ўтган йил охирида Қатардаги мундиалда кўрсатган ўйини унинг нархида янада ўсиш кузатилишини таъминлади. Ҳатто "Ливерпуль" жанубий америкалик футболчига расмий қизиқиш билдирди. Шундай бўлса-да, "кўклар" рақобатда барчадан ўзиб, Кайседони ўзиники қилиши маълум бўлмоқда. "Челси" ярим ҳимоячи учун 65 млн фунт тўлашга тайёр, "Брайтон" эса мавсум ўртасида асосий ўйинчиларидан бири билан йўлларини айро қилиш учун 75 млн фунт истайди.

Агар бу келишув амалга ошса, Мойзес Кайседо "Челси" ушбу ойда шартнома тузган олтинчи футболчи бўлади. Бундан аввал жами 152 млн фунтга Жоау Феликс, Давид Фофана, Андрей Сантос, Бенуа Бадиашиле ва Михаил Мудрик Поттер лойиҳасига қўшилган эди.