Эрон мураббийи: "Ўзбекистон футзал терма жамоаси катта футболдаги қизлардан йиғилган"

"Тошкентга 3 кунлик тайёргарлик билан етиб келган эдик. Лекин ўйиндан ўйинга футзалчилар ўртасидаги боғламлар яхшироқ ишлаяпти. Рақибларга ҳурмат сақлаган ҳолда айтишим мумкинки, Эрон ўз ўйинини топиб боряпти.

Гуруҳдаги асосий рақибимизга қарши ўйин қолди. Ўзбекистонга қарши баҳс нисбатан қийинроқ бўлса керак. Лекин улар катта футболда ҳаракатланадиган қизлардан таркиб топишган. Мен эса футзал бўйича Эрон суперлигасида ўйнайдиган қизлар билан келдим. Ғалаба учун ҳаракат қиламиз", — дейди Форузан Сулаймони хоним.

Шунингдек, учрашувнинг энг яхши футзалчиси сифатида эътироф қилинган Сара Ширбейги ҳам ўз фикрлари билан ўртоқлашди: "Рақибларда ўтган йилгига нисбатан ижобий томонга ўзгариш бор. Кеча Ўзбекистонни ҳам кузатдик. Анча томошабоб ўйин кўрсатишди. Умид қиламанки, охирги турда ажойиб тўқнашув гувоҳига айланамиз".