“Бунёдкор”: Қўқонлик мухлисларга ташаккур!

Қизиқарли ва муросасиз кечган “Қўқон-1912” - “Бунёдкор” учрашувида Элдор Шомуродов ва Шаҳзодбек Нурматов томонидан киритилган голлар “қалдирғочлар”га 2:0 ҳисобидаги ғалабани тақдим этди.

9 май куни бўлиб ўтган мазкур баҳсда ҳар иккала жамоа аъзолари стадионга йиғилган кўп минг сонли томошабинлар учун чиройли ўйин кўрсатишга ҳаракат қилишди. Баҳс давомида футболчилар томонидан ижро этилган ҳар бир чиройли ҳаракат ва уюштирилган комбинацияларни мухлислар олқишлаб туришди. “Бунёдкор” вакиллари гол киритган вазиятларда ҳам ишқибозлар майдондаги чиройли ҳаракатларни беэътибор қолдиришмади. Учрашув якунига етгач эса қўқонлик футбол ихлосмандлари “қалдирғочлар”ни қарсаклар билан кузатиб қўйишди. Бир кун аввал ёшлар лигаси доирасида ушбу жамоалар вакиллари иштирокида учрашувда ҳам шу каби ҳолатга шоҳид бўлган эдик.

Бундай ажойиб муҳитда тўп тепиш ҳар бир футболчига завқ бағишлаши шубҳасиз. Юксак маданият ва тартибли равишда мухлислик қилган, энг асосийси, чиройли футболни қадрлаб, футболчиларни олқишлар билан кузатиб қўйган қўқонлик мухлисларга “Бунёдкор” футбол клуби миннатдорчилик изҳор қилади.

“Бунёдкор” - мухлислар учун ўйнайди!”