Бу йил ҳам йилнинг энг яхши футболчи ва мураббийи аниқланмайди-ми?

2017 йил ПФЛ фақатгина ўз лигаси яхшиларини аниқлади. Натижада ОАВ томонидан аниқлаб келинадиган соврин эгасиз қолди.

2018 йил якунларига кўра 14 декабрь куни ПФЛ ўз яхшиларини аниқлайди. ЎФА йилнинг энг яхши футболчи ва мураббийини бу йил аниқлайдими? Бунга аниқлик киритиш мақсадида ЎФА матбуот хизматига мурожаат қилдик. Улар бизга 14 декабрь санасида ўтказиладиган тадбир ҳам ЎФА, ҳам ПФЛ учун битта бўлишини маълум қилишди.

Маълумот учун, 14 декабрда бўлиб ўтадиган тадбирда Ўзбекистон чемпионати (Суперлига)нинг энг яхшилари тақдирланиши ҳақида ПФЛ расмий сайти хабар берган эди. Бундан кўриниб турибди-ки, бу йил ҳам Ўзбекистоннинг энг яхши футболчиси ва мураббийи аниқланмайди.

Умид қиламизки, ЎФА бу муаммони тезкорлик билан бартараф этади ва энг яхшиларни аниқлашни ташкилот эмас, ОАВ ихтиёрига топширади. 14 декабрда бўлмаса-да, статистика учун йил сўнггига қадар бу ишни ЎФА матбуот хизмати амалга оширади. ПФЛ эса ўзининг яхшиларини аниқлаб 14 декабрь куни топшираверади.

Йилнинг энг яхшиси бўлиш учун Ўзбекистонда фаолият юритмаётган футболчилар ҳам ҳақли. Ундан ташқари, Суперлига мураббийи бўлмаган мутахассисларга ҳам имконият бериш керак.