Бобир Абдихолиқов: "Водийда терма жамоалар иштирокидаги учрашувларни жуда соғинишган"
22 мар 2018 16:38
Янгиликлар

Бобир Абдихолиқов: "Водийда терма жамоалар иштирокидаги учрашувларни жуда соғинишган"

Аввал хабар берганимиздек, бугун Ўзбекистон олимпия терма жамоаси Кения ОТЖга қарши ўртоқлик ўйинлари ўтказиш учун Фарғонага етиб келди.

ЎФА расмий сайти Ўзбекистон олимпия терма жамоаси ҳужумчиси Бобир Абдиҳолиқов билан қисқача суҳбатни чоп этди.

"Фарғоналик футболчилар бизни жуда яхши кутиб олишди. Бунинг учун уларга миннатдорчилик изҳор этамиз. Фарғонада катта футболни соғинишган. Бу ерда 2015 йилда “Истиқлол” стадионининг очилишида Янги Зеландия ёшлар терма жамоасига қарши халқаро ўртоқлик учрашуви ўтказилганди. Ўтган давр мобайнида ишқибозлар яна халқаро ўйинларни соғинишгани кўриниб турибди.

Эртага бўладиган Андижондаги баҳсда стадион тўлиши аниқ. Фарғонада ҳам бизни мухлислар қўллаб-қувватлашларига ишончим комил. Кения билан ўйинлар осон бўлмайди. Лекин мазкур баҳсларда мухлисларимизни хурсанд этишга ҳаракат қиламиз. Водийда терма жамоалар иштирокидаги халқаро ўйинларни жуда соғинишган.

Фурсатдан фойдаланиб, Кенияга қарши ўртоқлик ўйинларини водийда ўтказишга қарор қилган Ўзбекистон футбол Ассоциацияси раҳбариятига футболчилар номидан миннатдорчилик билдириб ўтмоқчиман" - деди Бобир Абдихолиқов.