Бахтиёр Бобоев: «Шодиев, Акбаров ва Пўлатов «Бунёдкор» билан шартнома тузишди»

Бу ҳақда клуб вице-президенти - бош директори Бахтиёр Бобоев айтиб ўтди.

- Футболчилар йиғилиб тиббий кўрикдан ўтишди. Дастлабки йиғин Янги йил байрамига қадар давом этади.
 

- Янги футболчилар ҳақида нима дея оласиз?
- Асосий таркиб билан бир нечта янги футболчилар ҳам шуғулланишмоқда. Вохид Шодиев («Бухоро»), Бобуржон Акбаров («Гулистон»), Шукурали Пулатов («Нефтчи») ФК «Бунёдкор» билан шартнома имзолаб бўлдилар. Яна бир қатор футболчилар бош мураббий Миражлол Қосимов бошчилигидаги мураббийларда илиқ таассурот қолдира олишса улар билан ҳам шартнома тузамиз.

- «Бунёдкор» хорижий йиғинлар вақтида қайси клубларга қарши назорат ўйинларини ўтказиши маълумми?
- Январь ойида БААда ўқув-машғулот йиғини режада бор. Жамоа 18 январдан 1 февралга қадар Дубайда бўлади. 2008 йилдан буён беш юлдузли «Жебель Али» мажмусига борамиз. Амирликлардаги йиғин вақтида Россия ва Украинанинг кучли клубларига қарши ўйнаймиз. Москванинг «Динамо» клуби биз билан 25 январь куни ўйнашга тайёрлигини тасдиқлади. 22 январь куни Украина чемпиони ҳисобланган «Шахтер» билан ўйин режалаштирилган. 31 январь куни эса Москванинг «Спартак» клуби билан ўйнамоқчимиз. Бу икки клуб ўйинларни тасдиқлашлари керак.

- 25 февраль куни клуб ОФК чемпионлар лигасида дастлабки ўйинни ўтказади. Февраль ойидаги йиғинлар қаерда ва қачон бўлиб ўтади?
-  4-17 февраль кунлари Туркиянинг Анталия шаҳрига борамиз. У ерда ҳам анъанага содиқ қолган ҳолда «Blue Waters» мажмусида яшаймиз. Мураббийлар штаби бу давр оралиғида 6та назорат ўйинини ўтказишмоқчи. Рақиблар ҳақида аниқ маълумотлар кейинроқ маълум бўлади. Тошкентга қайтган жамоа бир неча кундан сўнг Саудия Арабистонига учиб кетади. Айнан у ерда мавсумнинг дастлабки расмий ўйини бўлиб ўтади.

Мирзаҳаким Тўхтамирзаев суҳбатлашди.