Бахтиёр Ашурматов: "Истеъфога чиқишга тайёрман"

Сайтимизда ҳам мухлислар клубдан қаттиқ норози эканликларини "коммент"ларда билдириб ўтишмоқда. Ишқибозларнинг норозиликлари жамоа бош мураббийини ҳам қаттиқ ўйлантирганлиги бор гап. Шунинг учун кеча Ж.Кореядан Бахтиёр Ашурматов қўнғироқ қилиб вазиятга ойдинлик киритишга ҳаракат қилди. Мазкур суҳбатни қуйида бошқача шаклда мутолаа қилишингиз мумкин.

МУХЛИСЛАРГА МУРОЖААТ
Мен аввало мухлисларимиздан жамоамиз кўрсатган ўйинлар учун узр сўраб қоламан. Андижонга бориб тинмай жамоамизни олқишлаб тургансизлар, лекин футболчилар шунга яраша ўйин кўрсатишмаган. Бундан хабардорман. Ҳозир "Навбаҳор" сизларнинг қўллаб-қувватлашларинга муҳтож. "Пахтакор" билан ўтадиган учрашувда сизларнинг меҳр ва олқишларингизсиз биз ҳеч нарса қила олмаймиз. Мухлисларсиз футбол спорт тури эмас. Шундай экан, мана шундай оғир дамларда бизни олдимизда туришларингизни илтимос қиламан. Шуни ишонтириб айтаманки, олдиндаги бешта учрашувни юқори кайфиятда ўтказиб, сизларнинг ишончингизни қайта қозонамиз. Худо хоҳласа, 15 октябларга мухлислар билан йиғилиш ўтказамиз.

МАҚСАДИМИЗ - МУХЛИСЛАР МЕҲРИНИ ҚОЗОНИШ
Айни пайтда Жанубий Корея давлатида Ўзбекистон терма жамоаси билан бирга бўлиб турибман. Биласизми, сўнгги ўйинларда жамоам кўрсатган натижалар мени ҳайратлантирди. Охирги уч учрашув мухлисларнинг жамоадан кўнгли қолишига кифоя бўлди. Мен аввал ҳам кўп бор таъкидлаб ўтганман, бизнинг асосий мақсадимиз наманганлик мухлислар меҳрини қозониш бўлган. Дастлабки даврадаги ўйинларимиз билан кўпчиликни назарига тушдик. Хусусан, "Пахтакор", "Бунёдкор", "Насаф" жамоаларига қарши ўтказилган ўйинлардан сўнг ЎФФ президенти ва МОҚ раиси Мираброр Усмоновнинг ҳам эътиборига сазовор бўлдик. Бунинг натижасида клубга янги хомий ҳам бириктирилди. Ўша ўйинларимиз билан ишқибозларимизнинг меҳрини қозонаётгандик. Аммо сўнгги уч учрашувдаги натижалар билан мухлислар ишончини йўқотдик.

ВАТАН ШАЪНИНИ ҲИМОЯ ҚИЛИШ БУРЧИМИЗДИР
Жиззах ва Андижонда ўтган учрашувлар ҳақида тўлиқ маълумотга эга эмасман. Учрашув ёзилган дискни кўргач нималар бўлганлиги ҳақида гапирса бўлади. Лекин ҳозир бу ҳақда бирон бир фикр айта олмайман. Фақат голларни кўрганим билан тўлиқ хулоса қилишга эрта. "Бунёдкор" билан ўтган ўйинни кўришга эришдим. Шу учрашувда йигитлар ёмон ўйин кўрсатишмади, лекин яхши ҳам эмас. Ҳайронман, мен йўқлигимда жамоа умуман бошқача ўйинлар кўрсатди. Ватан шаънини ҳимоя қилиш мақсадида жамоа билан кўп муддат бўла олмадим, бу ҳам натижаларга таъсир кўрсатган бўлиши мумкин. Аммо Ўзбекистон номини ҳимоя қилиш барчамизнинг бурчимиздир, деб биламан.

ФУТБОЛЧИЛАРГА ИШОНАМАН
Жамоа билан бирга бўлмаган вақтимда ёрдамчиларим билан суҳбатлашиб, керакли маслаҳатларни бериб турдим. Барибир бош мураббий бўлмагандан сўнг вазият ўзгариши табиий. Андижонда ўтган дербидан сўнг айрим андижонлик мухлисларнинг менга айтишича ўйин умуман зерикарли ўтган. Ўйин келишилган ёки келишилмаганлиги номаълум. Шунчаки "Навбаҳор" умуман ўйнолмаган. Шахсан ўзим, бундай келишилган учрашувларга доим қарши бўлиб келганман. Футболчиларим орасида ўйинни сотадиганлари йўқ. Мен қўл остимдаги барча футболчиларга доим ишониб келганман. Аммо қайсидир ўйинчи кимдандир бир сўм олгани аниқланса ёки ўйинни сотгани маълум бўлса ундай футболчи учун жамоада жой йўқ.

ОЛДИНДАГИ ЎЙИНЛАР
Олдинда бизни яна 5 та учрашув кутиб турибди. 2 октябр куни "Пахтакор"ни қабул қиламиз. Мен Наманганга ўйин куни етиб бораман. Ҳозир бу ерда айрим масалалар туфайли ушланиб турибмиз. "Пахтакор" билан ўйиндан сўнг яна терма жамоа ихтиёрига қайтишга мажбурман. Бу вақтда терма жамоамиз ўртоқлик учрашувларини ўтказади. "Пахтакор"га қарши кечадиган учрашувда тошкентликларнинг ғалабаси аниқлиги айтилмоқда. Бу футбол, унда ғалаба ҳам, мағлубият ҳам бўлиб туради. Биз "Пахтакор"га қарши бор кучимизни сарф этиб, фақат ва фақат уч очко учун майдонга тушамиз. Яна шуни ҳам таъкидламоқчиманки, қолган учрашувларни юқори суръатда ўтказишига ҳаракат қиламиз.

БАРЧА ЖАРИМАГА ТОРТИЛАДИ
Тўғрисини айтганда, "Сўғдиёна" билан бўлган ўйиндаги натижани эшитиб "шок" ҳолатига тушиб қолдим, бундай ҳисоб ва ўйинни умуман кутмагандим. Ана шундай ўйинлар учун жамоамиз массажчисидан то менинг ёрдамчиларимгача барчани жаримага тортамиз. Жамоа ихтиёрига етиб боришим билан зудлик билан барча билан йиғилиб бўлиб ўтган ишлар юзасидан суҳбатлашамиз.

ИСТЕЪФОГА ТАЙЁРМАН
Мен мухлислар фикри билан доим қизиқиб келганман. www.lochinlar.asia ва бошқа сайтлардаги ишқибозлар фикрларини доим ўқиб тураман, улар нима исташларини кузатиб бораман. Сўнгги ўйинлардаги вазиятдан сўнг мухлислар мураббийлар штаби фаолиятидан қаттиқ норози. Буни жуда тўғри тушунаман. Бош мураббийликка мендан муносиброқ номзод бўлса, мухлислар мени кетишимни хоҳлашса дарҳол ўз ўрнимни бўшатиб беришга тайёрман. Янги мутахассис билан "Навбаҳор" юқори чўққиларга эришса бундан мен жуда хурсанд бўламан. Мен "Навбаҳор"га терма жамоа мураббийи бўлиш учун, юқорига кўтарилиш учун келмаганлигимни алоҳида таъкидлаб ўтишни истардим. Лекин менинг "Навбаҳор" билан режаларим бор. Аста-секин "Навбаҳор"ни пешқадамлар сафига қўшилишига ҳаракат қиляпмиз. Тўғри тушуниш керак, бир йилдаёқ натижа кўрсатиш жуда мушкул.


Улуғбек АБДУЛЛАЕВ тайёрлади