Италия Суперкубоги, Б Серия рекорди... Ака-ука Инзаги мураббий сифатида нималарга эриша олади?

Айнан у сабаб миллионлаб болакайлар футболга, бевосита "Милан"га мухлис бўлиб қолган, маҳаллаларда ўзларини Пиппо деб чақиришларини истарди.

Ҳозирги даврга келиб эса Филиппо Инзаги мураббий сифатида Б Серия рекордини ўрнатди – унинг "Беневенто"си 19 турда 46 очко тўплади.

Симоне Инзаги "Лацио" рекордини янгилади – чемпионат доирасида қаторасига тўққизта ғалаба, параллель равишда Италия Суперкубоги қўлга киритилди.

Ака-укалар энди мураббий сифатида натижа кўрсата бошлади, улар қандай натижага эриша оларкин? Умуман мураббий сифатида қай даражагача чиқа олишади? Буни вақт кўрсатади, аммо бошланиши унчалик ёмон эмас.

Уларнинг отаси Жанкарло шундай дейди:

"Биз 40 йил олдин қандай бўлган бўлсак, ўша-ўшамиз. Кунига 3-4 марта гаплашиб турамиз. Симоне доим ўйин тугагач телефон қилади. Учрашув тугагач, у телефон қилгунча, кўпи билан 4 дақиқа ўтади. Баъзан фақат икки оғиз гап айтади, баъзан кўпроқ гаплашамиз. Суперкубокдаги ғалабадан сўнг у менга майдондалигидаёқ телефон қилди. 

Пиппо финал ҳуштагидан 15-20 дақиқа ўтгач, қўнғироқ қилади. Кўпинча биз тактика борасида баҳслашамиз".

"Пиппо "Ювентус" рекордини янгилай олди. Тасаввур қиляпсизми, ахир ўшанда жамоада Буффон, Дель Пьеро, Трезеге, Каморанези ва кўплаб юлдузлар ҳаракат қиларди… Бу улкан хурсандчилик, катта натижа. "Лацио"нинг Суперкубокдаги ғалабаси ҳам ундан қолишмас ҳисларни тақдим этди".

"Хасад? Бизнинг оиламиз луғатида бундай сўзнинг ўзи йўқ. Улар бир-бирларининг ғалабасидан қувонадилар ва бирор иш ўхшамаса, бир-бирларига қайғурадилар. Улар баҳслашгани ёки бир-бирларини танқид қилганларини ҳеч қачон эшитмаганман".

"Ўйинларни қандай томоша қиламиз? Аёлим бошқа хонада, мен меҳмонхонада кўраман. Пардалар тўлиқ тортилади, ҳеч қандай ёруғлик бўлмаслиги керак. 15 дақиқадан сўнг хона тутун бўлиб кетади. Фақатгина ўйин кунлари мен тамаки ва ликёрга мурожаат қиламан". 

"Беневенто" президенти Пиппо билан суҳбатдан сўнг, ундан ҳайратда қолганини айтганди. Уларнинг биринчи учрашувидан 10 дақиқа ўтгач, Филиппо столда апельсинлар ёрдамида президентга жамоа қандай ҳаракат қилишини тушунтириб кетган.

Умид қиламанки, уларнинг ҳар иккиси яхши мураббий бўлиб етишади. Асосийси биз ҳар қандай вазиятда бир-биримизни ташлаб қўймаймиз. Менимча, оила ана шундай бўлиши керак".

Нозима Зарипова таржимаси