Ахбор Имомхўжаев хотира турнирида 10 та жамоа иштирок этади

Сир эмаски, “Пахтакор” жамоасининг ташкил этилиши ва шу номдаги стадион ишга туширилишида Ахбор ота бевосита иштирок этган шахслардан биридир. Катта авлод бу инсонни “Пахтакор” билан бирга ёд олади. Шундан келиб чиқиб, ўз вақтида “Пахтакор” шарафини ҳимоя қилган машҳур фахрий футболчилар мусобақада иштирок этади.

Шунингдек, қаҳрамонимиз Ўзбекистон футбол ассоциациясида узоқ йиллар меҳнат қилган. Чемпионат ўйинларида комиссар сифатида фаолият олиб борган. Аввал ҳакамлик, кейин эса ҳакам назоратчиси сифатида мамлакат футболи ривожига улкан ҳисса қўшган. Бунинг ҳурмати мусобақанинг амалдаги чемпиони ЎФА Равшан Эрматов бошчилигида турнирда қатнашади. Шунингдек, яқин ўтмишда рефери сифатида фаолият олиб бориб, эндиликда назоратчи сифатида ишлаётган шахслардан иборат ЎзФҲМ жамоаси ва ЎзПФЛ жамоаси ғолиблик учун кураш олиб боради.

Хотира турнирида футбол шарҳловчиларидан тузилган юлдузли жамоа ҳамда асосини спорт журналистлари ташкил этадиган жамоа ҳам иштирок этади. Championat.asia ва Kun.uz каби нашрлар ҳам чемпионлик учун беллашади.

Сир эмаски, Ахбор Имомхўжаев умрининг сўнгги йилларини “Тонг” фахрийлар жамоасида билан бирга ўтказди. Айнан шу жамоа ҳам мусобақага таклиф этилган. Мусобақанинг сўнгги жамоаси эса қаҳрамонимизнинг оила-аъзолари, ўғил ҳамда набираларидан ташкил топган “Сулола” жамоасидир. Бу жамоа бир йил муқаддам финал учрашувида ЎФА билан тўқнаш келиб, якунда мусобақани 2-ўринда якунлаганди.