Антонио Конте: “Бизда фантастик серия. Мени эмас, футболчиларимни табрикланг”

 “Кристал Пэлас” устидан (1:0) ғалаба қозониб, ғалабали сериясини 11 та учрашувга етказган “Челси” устози Антонио Конте учрашув ҳақидаги фикрлари билан ўртоқлашди.

“Бизда фантастик серия.  Футболчиларимни табриклашингиз мумкин. Мен улардан хурсандман, чунки улар бунга лойиқ эдилар. Мен ҳар куни шогирдларимнинг ўз ишларига бўлган муносабатларини - ўйинга жон жаҳдлари билан  тайёргарликларини кузатаяпман. Эндигина 17-тур ортда қолди. Танаффусга қадар яна иккита тур бор. Биз яхши ишлаяпмиз ва шу сабаб муносиб поғонада бормоқдамиз. Жадвалга эътибор қилмасдан ўз ишимизни давом эттиришимиз лозим.

Биз ҳужум ва ҳимоя ўртасидаги мувозанатни топа олдик. Бир қатор вазиятларда дарвозабонимиз ҳал қилувчи ролни бажарди. Ўтган турда биз майдонда рақибга нисбатан устунлик қилган бўлсакда, Куртуа ажойиб “сейв”и орқали бизни голдан қутқарди. Ўтган мавсумда у кўплаб голлар ўтказди. Аммо бу йил унинг ишлари жойида. Биз жамоавий ҳимояланиб, ҳужумга ҳам кўпчилик бўлиб ўтмоқдамиз. Афсуски, бугунги баҳсда Диего Коста бешинчи сариқ карточкасини олди. Бу унга муносибмимиди ёки йўқ, билмайман. Аммо бу вазият рўй берди ва биз бошқа ҳужумда бошқа вариантларни кўриб чиқамиз. Коста ва Канте биз учун ўта муҳим футболчилар” дейди Конте.