Александр Мочинов: CAFA байроғи остидаги турнир ОЧ саралашига яхши тайёргарлик вазифасини ўтайди

Мазкур турнир олдидан Ўзбекистон U-15 термаси бош мураббийи сифатида Тожикистонга келган Александр Мочинов ўз фикрлари билан ўртоқлашди.

“CAFA байроғи остидаги ушбу турнир барча ўсмирлар терма жамоаларига Осиё чемпионати саралаш баҳслари олдидан яхши тайёргарлик вазифасини ўтайди. Ёш иштирокчилар ўзига яраша тажрибага эга бўлади ва энг асосийси улар бошқа мамлакат термаларида ўзига янги дўстлар орттиради. Мусобақага яхши тайёргарлик кўрилганини алоҳида қайд этиб ўтмоқчиман.

Бу ердаги ажойиб муҳит мазкур турнирни янада рақобатбардош ўтишига, шунингдек, футбол оламида янги ўйинчилар кашф этилишига хизмат қилади. Барча ташкилотчи ва иштирокчиларга футбол байрами мазмунли ўтишига тилакдошман”, – деди Александр Мочинов.

Аввалроқ Ўзбекистон U-15 термаси 13–17 июнь кунлари Хитойдаги халқаро мусобақада иштирок этиши ҳақида хабар берилганди. Турнирлар орасидаги тақвим тиғиз бўлгани сабабли, Ўзбекистон ўсмирлар термаси иккига бўлинди. CAFA CUP U-15 мусобақасига футболчиларни Александр Мочинов олиб кетган бўлса, Дилшод Нуралиев ўз шогирдларини Хитойдаги мусобақага тайёрламоқда ва улар билан у ерга йўл олади.