Александр Мочинов: "Байрамга ЖЧ йўлланмасини ҳадя қилмоқчимиз"

Кеча асосий тантана ўтказилган бўлса, бугун шаҳар ва қишлоқларимизда байрам шукуҳи давом эттирилади. САда навбатдаги табрик Ўзбекистон ўсмирлар (U-16) терма жамоаси бош мураббийи Александр Мочиновдан.

- Ҳурматли юртдошлар ҳамда мамлакатимиз меҳмонлари, сизларни чин қалбимдан истиқлолнинг 23 йиллиги билан табриклайман. Байрамни бизга Тошкентда нишонлаш насиб қилмади. Шу кунларда Таиланддамиз. Менинг тилакларимга терма жамоамизнинг барча аъзолари қўшилишади.

Ўйлайманки, футболчилар Бангкокда старт олиш арафасида турган Осиё чемпионатида муваффақиятли ўйнаб, чиройли ғалабалар ҳамда жаҳон чемпионати йўлланмасини тақдим этишади. Барчамизнинг ниятимиз шу. Кайфиятлар аъло даражада. Тайёргарлик кучайтирилган режимда давом эттириляпти. Таиланддан олдин Куала-Лумпурда йиғин ўтказдик ва унинг доирасида Малайзия ёшлар (U-19) ҳамда ўсмирлар (U-16) терма жамоаларига қарши ўртоқлик учрашувларида майдонга тушдик. Фурсатдан фойдаланиб, яна бир бор байрам муборак бўлсин, азиз юртдошлар!

Камолиддин АЛИМОВ ёзиб олди